Лета выдалася гарачым не толькі па тэмпературных рэкордах, але і па рэлізах беларускіх музыкаў. Сёння ў падборцы трэкі, якія мы ганялі ў слухаўках цэлае лета, пад якія танчылі і смяяліся, а таксама музыка, пад якую мы сумавалі ды флэшбэчылі. Спадзяемся, восенню гэтыя песні дадуць вам цеплыні, ці ўратуюць ад тугі і дэпрэсіўных эпізодаў (альбо не).
Suma — Kupalinka
Якое ж лета без народных спеваў у сучаснай апрацоўцы? Версію добра вядомай беларускай песні перараблялі і рэміксілі не адзін раз, але адзначым, што тут эксперымент атрымаўся неверагодна стылёвы і якасны.
Suma ўвогуле адна з беларускіх першапраходцаў у так званым жанры электроннага фолку, дзе перамяжоўваюцца старажынакультурныя патэрны і сучасная электронная музыка. Хацелі Купалінку, пад якую можна рэйвіць? Трымайце!
Leibonik — Emigrant Song
Мяркуем, каментары тут залішнія, бо па назве песні ўсё ўжо зразумела. Гурт найбольш вядомы нам па сваіх вясёлых песнях з сатырычнымі метафарамі, але ў гэтай кампазіцыі ўсё сур’ёзна і па-сапраўднаму. Праз параўнанне «сваё/чужое» раскрываецца асноўны пасыл і любоў да сваёй, хоць часам, і дзіўнай, але Радзімы. Пакалдырыць ля дняпроўскіх берагоў і ўзгадаць ўзор мапідаўскай шпалеры — жадаем вам пры праслухоўванні гэтага трэка.
Zeman — Vandroŭny cyrk majho hramadskaha žyćcia
Олдскульны рэп чакалі? Не? А мы, вось, прынеслі!
Яшчэ напачатку лета мы пачулі альбом «Vandroŭny cyrk majho hramadskaha žyćcia» — дзясяты сольны альбом рэпера, у якім ён не цураецца сваёй даросласці і сталасці і запускае ў слухача важнымі пытаннямі, адказы на якія абсалютна кожны можа знайсці ўнутры сябе самога, але не без дапамогі дадзенага альбому.
LEAR — Маветон
Якасны жаночы поп пра любоў да сябе, адстойванне асабістых межаў і шляху да эмацыйнай стабільнасці. Лічым, што гэты сінгл можа быць гімнам усіх дзяўчат, якія скончваюць таксічныя стасункі і знаходзяць сваё «я».
Файны тэкст, якасны інструментал і пранікнёны вакал. Нагадваем: у любой сітуацыі абірайце сябе.
Nevika — Вечарына
Апошнім часам беларускія дзяўчаты ладзяць добры варушняк у поп-музыцы. Сапраўдным адкрыццём года стала Вікторыя Валатовіч (яна ж Nevika). Яе летні трэк «Вечарына» сапраўды разгойдвае і дасылаем тусовачные вайбы наўпрост у вашыя слухаўкі і калонкі. Пачынаць варушыцца пад модны біт можна ўжо з першых секунд праслухоўвання.
Nochy — Месяц
Меладычна-цягучая кампазіцыя на матыў калыханкі, з выдатнай гармоніяй, бэк-вакаламі, тэкстам, ідэяй і падачай. Месяц тут выступае як сімвал чагосьці сакральнага, схаванага ў кожным чалавеку.
Асноўны вакал — пяшчотны, мяккі і здольны расчуліць любога. Трэк як мага лепей падыходзіць для доўгіх восеньскіх вечароў з кубкам гарбаты ва ўтульным фатэлі.
Souqween — Зялёныя вочы
Новае пакаленне беларускага рэпу ніяк не горш за мінулае. Адно з падцверджанняў — гэты трэк. Лірычны тэкст у сумесі з модным бітом агортваюць слухачоў атмасферным стана закаханасці (але не заўсёды ўзаемнай). Лейтматывам, канешне ж, зялёныя вочы, якія так нагадваюць поле ўночы.
Intelligency — August (pa-belarusku)
Чакалі-чакалі і нарэшце, дачакаліся! Напрыканцы лета, ужо вядомы сусветны гурт выпусціў версію свайго хіта па-беларуску. Прымеркавалі гэта да дня нараджэння трэка — яму споўнілася 3 гады. Каментары залішнія, лепш паслухайце песню.
Mandzik — Maładość
Яшчэ адзін трэк на тэму вымушанай эміграцыі. Кампазіцыя, безумоўна, вартая ўвагі, бо закранае важныя тэмы і выклікае кожнага на размову з самім сабой. На бэк вакале беларуская актывістка — Надзея Сядун, а вокладка аўтарства Караліны Паляковай. Вось такая эмігранцкая беларуская калабарацыя выйшла, якую дакладна, трэба паслухаць хоць раз.
Бачу ўпершыню — Давай запомнім наша лета
Апошні летні акорд на мяжы восеньскай пары. За вершаваны парт рэчытатыву адказны беларускі паэт Алесь Снег, а на вакале чутны Уладзіслаў Лепяшынскі, якога олды могуць ведаць па гурту «Лепшы квас». Маніфест наступны «запомніць гэтае лета і захаваць яго ў сабе ўнутры».
А мы захоўваем гэтую песню сабе і жадаем усім прыемнай восені!
Любіце беларускую музыку, слухайце беларускую музыку і да наступнай сустрэчы! Будзьма!
Хатні Топмсан, budzma.org
Чытайце яшчэ: У Варшаве пройдзе фэст беларускай музыкі «Грай»
