“Ці зблізку ты, ці здалечы,
Вясёлы ці сярдзіты, —
Вучыся добра ў Малечы,
Лячыся добра ў Малечы,
Мястэчку знакамітым!”

Такім паэтычным экспромтам пачаў свой выступ у Малечскай санаторна-лясной школе паэт Леанід Дранько-Майсюк. На Бярозаўшчыну ён завітаў разам са сваім сябрам паэтам і бардам Эдуардам Акуліным і намеснікам галоўнага рэдактара часопіса “Бібліятэка прапануе” Людмілай Несцяровіч. Тут, у знакамітым мястэчку Малеч, якое колісь мела Магдэбургскае права, 12 снежня ў межах кампаніі”Будзьма” было наладжана тры творчыя сустрэчы.

Спачатку слухачамі знаных паэтаў былі вучні санаторна-лясной школы-інтэрната, якія прыяжджаюць у Малеч на аздараўленне з усіх куткоў Брэсцкай вобласці. Затым “паэтычны дэсант” перамясціўся ў Малечскую сярэднюю школу, дзе ў актавай зале засвоіць урок паэзіі сабралася каля двухсот вучняў ад 5 да 11 класаў. Абедзьве сустрэчы з вучнямі прайшлі весела, з гумарам на высокім паэтычным гучанні. Не абыйшлося і без літаратурных віктарын, за перамогу ў якіх самыя абазнаныя вучні атрымалі ўзнагароды ад кампаніі”Будзьма”.

Трэцяя сустрэча адбылася з работнікамі бібліятэчнай сістэмы Бярозаўскага раёна. Акрамя літаратурнай часткі тут яшчэ ішла шчырая і сур’ёзная размова аб лёсе беларускай кнігі, аб яе значэнні ў выхаваўчым працэсе ў школе. Напрыканцы сустрэчы паэты і бібліятэкары паразумеліся на тым, што толькі разам, агульнымі намаганнямі, у тым ліку і такімі вось “ літаратурнымі дэсантамі” ў глыбінку, можна вярнуць былы аўтарытэт беларускай Кнігі, беларускай Паэзіі, беларускага Слова.

Тэгі: Берасцейшчына, Бяроза