Ці любіце вы аладкі, дранікі, блінцы? Калі так, то гэтая страва вам дакладна спадабаецца. Цыбульнікі – сваякі аладак, толькі не салодкія і з цыбуляй. А паколькі летам шмат свежай зеляніны, то наш варыянт стравы з зялёнай цыбуляй. На сняданак – лепш не прыдумаеш: хутка, смачна і сытна.

Як звязаныя цыбульнікі і беларускія татары?

На беларускіх землях татары з’явіліся яшчэ ў далёкім XIV стагоддзі, бо былі запрошаны Вялікім князем Гедымінам з Залатой Арды і Крыма. З удзелам татараў фарміравалі перадавыя атрады для змагання з тэўтонскімі рыцарамі.

Глядзіце яшчэ: Ці быў Гедымін каралём Літвы і Русі? Адказваем у «Гісторыі за 5 хвілін»

Татары рассяліліся вакол Вільні па паўночна-заходніх стратэгічных кірунках. Жывуць татары ў Беларусі і сёння, цэнтр іх размяшчання знаходзіцца ў горадзе Іўе, што на Гродзеншчыне.

Гэты народ праславіўся ў нашай гісторыі не толькі як удалыя ваяры, але і як паспяховыя гаспадары. Пры татарскай сядзібе заўсёды быў багаты ўраджай, які пераўтвараўся ў вялікую колькасць ласункаў на татарскім стале. Многія татарскія стравы за доўгія стагоддзі палюбіліся нашым продкам, а некаторыя цяпер вядомыя як фастфуд: чэбурэкі і беляшы.

Глядзіце яшчэ: Піца па-беларуску, або смажанка. Гатуем беларускі фаст-фуд разам з «Будзьма!»

Яшчэ адна страва, якую можна прыгатаваць вельмі хутка і проста – гэта цыбульнікі! Гатуюцца прыкладна як аладкі, толькі не салодкія і з дадаткам цыбулі. Татарскія аладкі можна гатаваць не толькі з зялёнай або рэпчатай цыбуляй, яшчэ ў іх дадавалі фарш з ялавічыны, качкі або грыбоў. Смажылі іх на курдзюку – бараньім тлушчы.  

Да цыбульнікаў абавязкова падавалі запраўленую часнаком і прынадамі смятану або іншыя соусы: мачанку. Цыбульнікі маглі быць і гарнірам да супоў ці ласункаў з мяса.

Як прыгатаваць цыбульнікі?

1.     У посуд усыпаць некалькі лыжак мукі, убіць два яйкі, соль і перац, або іншыя прынады – па смаку, уліць шклянку кефіра і добра вымешаць.

2.     Вымешвайце цеста, пакуль яно не стане аднародным і не знікнуць усе камы. Калі цеста атрымліваецца занадта вадкім – дадайце крыху мукі, яно павінна быць даволі шчыльным.

3.     Зялёную цыбулю дробна пакрышыце і дадайце у цеста, яшчэ раз добра вымешайце.

4.     Смажыць цыбульнікі на добра разагрэтым алеі ці тлушчы з абодвух бакоў да залацістага колеру.

5.     Пакуль смажацца татарскія аладкі, у смятану дадайце перац, пасечаны кроп і натаракаваны часнок па смаку. Смятанны соус добра вымешайце і падавайце з ім цыбульнікі.

Прыгатаванне такога сняданка займае не больш 20 хвілін і падаваць цыбульнікі варта з патэльні. Смачна есці!

Нам спатрэбіцца для цыбульнікаў:

Мука – 200 грамаў

Кефір – 170 мілілітраў

Зялёная цыбуля – 100 грамаў

Яйка – два штукі

Соль і перац – па смаку

Алей – тры сталовыя лыжкі

Для смятаннага соуса:

Смятана – 200 грамаў

Часнок – 2 зубкі

Пук кропу

Пераць – па смаку