ГА «Саюз беларускіх пісьменнікаў» працягвае свой відэапраект — цыкл літаратурных гутарак «Кантэкст». У кожным «Кантэксце» вас чакаюць інтэрв’ю з вядомымі беларускімі літаратарамі, а таксама іх аўтарскія чытанні.
У новым выпуску вядоўцы «Кантэксту» Усевалад Сцебурака і Ціхан Чарнякевіч гутараць з паэткай, перакладчыцай Галінай Свірынай.
Гераіня нашай перадачы нарадзілася 5 лістапада 1983 года ў Берасці (Беларусь). У 2001 годзе скончыла англійскі профіль берасцейскага гададскога ліцэя № 1, узнагароджаная залатым медалём. У 2006 годзе скончыла факультэт замежных моў Берасцейскага дзяржаўнага універсітэта імя А.С. Пушкіна з дыпломам з адзнакай (спецыяльнасць «лінгвіст, выкладчыца англійскай мовы, нямецкай мовы, беларускай мовы і літаратуры). У 2007 годзе скончыла магістратуру, а ў 2011 годзе — аспірантуру філалагічнага факультэта БДУ (спецыяльнасць «тэорыя мовы»).
У 2006-2007 і 2012 гг. працавала выкладчыцай англійскай мовы на факультэце замежных моў БрДзУ імя А.С. Пушкіна. З 2008 да 2016 супрацоўнічала з выдавецтвамі «IDEAnomix» (Менск) і «Питер» (Расія) як перакладчыца навукова-папулярнай літаратуры з англійскай мовы на рускую. У 2016–2017 навучальным годзе працавала настаўніцай англійскай мовы ў сярэдняй школе № 23 г. Менска. Рэдагуе і карэктуе тэкты беларускай мастацкай літаратуры (Ч. Букоўскі «Чытво», рэдактар; Наталка Харытанюк «Казкі старога Адамкова», карэктар; К. Ісігура «Не адпускай мяне», рэдактар).
Піша вершы па-беларуску з 2017 года. Аўтарка кнігі вершаў «Зоў звычаю» (Менск, Медысонт, 2018), якая была ўзнагароджана прэміяй «Дэбют» імя Максіма Багдановіча (намінацыя «Паэзія»). Удзельніца праграмы «Рэзідэнцыя маладога літаратара» (Вільня, 2017). Брала ўдзел у фестывалі «Вершы на асфальце» імя Міхася Стральцова, фестывалі інтэлектуальнай кнігі «Pradmova».
Будзьце ў «Кантэксце» і не забывайце падпісвацца на канал y Youtube!