Новая кніга Кірыла Стаселька “Marginalis” дасягнула рэкорду, як твор беларускай літаратуры з самай вялікай канцэнтрацыяй персанажаў.
Раман “Marginalis” выйдзе з друку толькі на пачатку лістапада, але ўжо быў прызнаны самым насычаным, у плане персанажаў, творам беларускай літаратуры. У рамане аб’ёмам 251 944 знака сустракаецца як мінімум 136 персанажаў.
Рэкорд быў зафіксаваны беларускім аналагам Кнігі рэкордаў Гінэса – праектам “Рэкорды Куфара”. Даведацца больш пра рэкорд Кірыла Стаселька і ягонага рамана “Marginalis” можна на адмысловай старонцы праекта.
Marginalis – насычаны і захапляльны філасофскі раман, дзеянні якога ахопліваюць больш за чатырыста гадоў, паўтары сотні персанажаў і дзясятка краінаў, пазл з мноства сюжэтных ліній і філасофскіх ды псіхалагічных матываў, якія складаюцца ў адно цэлае.
Дзеянні рамана разгортваюцца вакол уладальнікаў старажытнай загадкавай кнігі. У пошуках сябе і свайго “я” героі рамана прыходзяць да разумення, што часам не меншае значэнне мае тое, што знаходзіцца на палях, па-за цэнтрам, па-за межамі. Па-за межамі гісторыі, жыцця, увагі.
Кніга з’явіцца ў продажы ў лістападзе, а пакуль сачыць за навінамі пра раман можна праз хэштэг #Marginalis
Папярэдняя кніга Кірыла Стсаселька “Дзіцячы маніфест” выйшла летась ды была намінаваная на шэраг літаратурных прэмій, у прыватнасці, трапіла ў шорт-ліст прэміі “Дэбют” і лонг-ліст “Гедройца”.
Кірыл Стаселька нарадзіўся ў Барысаве. У 2013 скончыў факультэт філасофіі і сацыяльных навук БДУ па спецыяльнасці “Сацыялогія”, у 2014 — магiстратуру Інстытута падрыхтоўкі навуковых кадраў пры НАН РБ. З’яўляецца выпускніком Беларускага калегіума, Лятучага ўніверсітэта, Школы маладога пісьменніка пры ГА “Саюз беларускiх пiсьменнiкаў” і Школы маладых менеджараў публічнага адміністравання (Беларусь, Швецыя).
На дадзены момант навучаецца ў аспірантуры Акадэміі навук, з’яўляецца дырэктарам “Агенцтва інфармацыйных тэхналогій “Буцэфал”, кіраўніком інтэрнэт-часопіса infographer.by і каардынатарам праекта “Народны журналіст”.
