9 снежня праект Cinemascope пры падтрымцы Пасольства Германіі ў Рэспубліцы Беларусь прадстаўляе ў кінатэатры «Масква» спецыяльны паказ рэстаўраванага шэдэўра Фрыдрыха Вільгельма Мурнау «Фауст» (1926) у суправаджэнні сімфанічнага аркестра і хору музычнай капэлы «Санорус» пад кіраўніцтвам дырыжора Аляксандра Хумалы.
«Фауст» — адзін з апошніх класічных твораў нямецкага экспрэсіянізму. Сцэнарый карціны заснаваны на старажытных нямецкіх паданнях, аднайменнай трагедыі Гётэ і драме «Доктар Фауст» брытанскага драматурга Крыстафера Марло. У працы над сцэнарыям прымаў удзел лаўрэат Нобелеўскай прэміі, пісьменнік Герхарт Гауптман, а ролю Мефістофеля выканаў Эміль Янінгс — галоўная зорка нямецкага нямога кіно, парцье з «Апошняга чалавека» і прафесар Рат з «Блакітнага анёла».
«Фауста» называюць самым маляўнічым фільмам у гісторыі сусветнага кінематографа. Ніводнаму рэжысёру да Мурнау не ўдавалася так пераканаўча паказаць звышнатуральныя з’явы ў павільённых дэкарацыях. Ніякіх спецэфектаў у сучасным разуменні слова тады не існавала — усё дасягалася гульнёй святла і ценю, а мастацтвам гэтай гульні Мурнау валодаў дасканала.
Аўтарам новага музычнага суправаджэння да фільма выступіла Вольга Падгайская — кампазітар, арганіст, аўтар сімфанічных, камерна-вакальных і камерна-інструментальных твораў, музыкі да спектакляў і кіно, удзельніца ансамбляў новай камернай музыкі Five-storey ensemble і Rational diet, а таксама адна з арганизатараў міжнароднага фестывалю нямога кіно і сучаснай музыкі КІНЕМО.
Пачатак у 19:00.
Квiткi можна набыць у касе кінатэатра цi анлайн
Кінатэатр «Масква»: г. Мінск, пр-т Пераможцаў, 13 (ст.м. «Няміга»)
