Частку экспанатаў музея ў Старых дарогах ліквідавалі па просьбе прарасійскай актывісткі Вольгі Бондаравай. Яна запэўнівала, што ў музеі «на ўсю моц праслаўляюцца ваенныя злачынцы і нацысты».

Змагацца з экспазіцыяй музея Анатоля Белага Бондарава пачала яшчэ ў жніўні 2022 года, назваўшы ўстанову «неанацысцкім логавам», тады ж быў прыбраны барэльеф Наталлі Арсенневай, але гэтага аказалася мала. Бондарава настойліва патрабавала прыбраць выявы братоў-Луцкевічаў.

16 лістапада актывістка ў сваім тэлеграм-канале заявіла, што была ліквідаваная «русаненавісцкая пранацысцкая экспазіцыя» ў Старых дарогах. Падтрымаў «ініцыятыву» Бондаравай па ліквідацыі экспазіцыі старшыня Пастаяннай камісіі па нацыянальнай бяспецы НС РБ генерал-маёр Алег Белаконеў, які з’яўляецца ўраджэнцам Расіі. Разам з братамі-Луцкевічамі зніклі бюсты і барэльефы кіраўніка вызвольнага паўстання 1863 года Кастуся Каліноўскага і паэткі-дысідэнткі Ларысы Геніюш.

Экспазіцыя пад адкрытым небам зараз выглядае так

Прыватны музей гісторыі Беларусі ў Старых Дарогах быў створаны краязнаўцам і выкладчыкам БДУ Анатолем Белым. На прыватнай тэрыторыі ён пабудаваў музей, частка экспанатаў захоўвалася пад адкрытым небам. У музеі дзейнічае 8 залаў, у якіх прадстаўлены разнастайныя экспанаты: творы мастацтва, карціны, бюсты выбітных гістарычных асобаў. Экспазіцыя была ўрачыста адкрытая 11 снежня 1999 года.

Анатоль Белы памёр 15 лістапада 2011 года. Пасля яго смерці развіццём музея займаліся ягоная жонка Ала і стрыечны брат Міхаіл.