Музычныя выступы, кінапаказы, спектаклі, выстава, майстэрня — з 9 па 11 верасня ў Мюнхене зладзяць фестываль беларускай культуры Minsk x Minga, паведамляе Reform.by.
У праграме — моцная музычная частка: класічны канцэрт опернай дзівы Маргарыты Ляўчук (9 верасня), выступленне этна-гурта Kriwi, дыджэйскі сэт нямецкай і беларускай музыкі ад Papa Bo Selektah Mix & Mingle (10 верасня), канцэрт электра-поп спявачкі PALINA — Республика Полина (11 верасня).
Тэатр будзе прадстаўлены: з беларускага боку — перформансам Ігара Шугалея «375 0908 2334 / Цела, якому вы тэлефануеце, зараз недаступнае». Ён адбудзецца 10 верасня.
З нямецкага боку — Баварскі лялечны тэатр 11 верасня прэзентуе пастаноўку «Лялька Трытратрулала вярнулася» — спектакль будзе дэманстравацца ў межах адмысловай праграмы для дзяцей. Тут жа беларуская музыка і рэжысёрка Света Бень правядзе майстар-клас для дзетак «Добры волат».
Афіша фэсту
Кінаблок парадаваў нечаканасцямі: гледачы фестывалю атрымаюць магчымасць убачыць адны з найлепшых фільмаў беларускіх рэжысёраў: дакументальны «Стрыптыз і вайна» Андрэя Куцілы і ігравы «Возера радасці» Аляксея Палуяна. Дарэчы, «Возера радасці» — гэта тая самая стужка, якая вылучалася на «Оскар» ад Германіі/Беларусі ў 2021 годзе.
Гэтаксама форум не абміне і беларускае сучаснае мастацтва. 10 верасня ў мюнхенскім Доме статыстыкі адкрыецца выстава мастачкі Ксюшы Ангелавай «Беларускі мартыралог: Абліччы і стыгматы». Выказванне аўтаркі — пра беларускіх палітзняволеных.
Галоўнай жа пляцоўкай фестывалю, акрамя першага дня, стане Backstage Kulturzentrum — адна вядомах сцэн у горадзе, «спецыялізацыя» якой — альтэрнатыўная музыка і мастацтвы. Backstage Kulturzentrum размешчана на мосце Фрыдэнхаймера ў раёне Нойхаўзен-Німфенбург і ўключае ў сябе хол, клуб, фабрыку і паб.
Адкрыццё падзеі адбудзецца ў Прыдворным храме Усіх Святых, дзе выступіць, нагадаем, Маргарыта Ляўчук.
Квіткі на мерапрыемствы можна набыць тут.
Арганізатарам фестывалю выступае аб’яднанне беларусаў Германіі.