Сёння пачаўся дзявяты месяц, як беларускі філосаф і метадолаг Уладзімір Мацкевіч знаходзіцца за кратамі, пішуць калегі Уладзіміра.
Ён быў затрыманы 4 жніўня 2021 года па абвінавачванні ў «арганізацыі групавых дзеянняў, што груба парушаюць грамадскі парадак» (ч. 1 арт. 342 КК).
Пасля шасці месяцаў зняволення ў турме Уладзімір Мацкевіч абвесціў галадоўку, патрабуючы рэальнага, а не імітацыйнага следства па сваёй справе. Толькі на 13 дзень галадоўкі, калі стан здароўя філософа значна пагоршыўся, справа нарэшце «зрушылася з мёртвай кропкі» і следчыя дзеянні актывізаваліся.
Ад самага пачатку філосаф казаў, што ўся яго правіна — у «мыслезлачынстве». І яго патрабаванне давесці справу да суда — гэта патрабаванне да беларускага рэжыму публічна прызнаць, што кідае людей за краты толькі за тое, што яны маюць адвагу мысліць самастойна.
Але ўзровень сакрэтнасці вакол справы Уладзіміра Мацкевіча і сёння застаецца на ўзроўні дзяржаўнай таямніцы. Грамадскасці вядома толькі, што да першапачатковага дадалося абвінавачванне па ч. 1 арт. 361-1 КК («стварэнне экстрэмісцкага фарміравання»), ды і тое стала пра гэта вядома, толькі дзякуючы «зліву» ў адным з праўладных тэлеграм-каналаў. Адвакаты знаходзяцца пад жорсткай падпіскай аб неразгалошванні, акрамя таго, пасля галадоўкі Уладзімір Мацкевіч перастаў атрымліваць лісты, лісты ад яго такасама ўжо месяц не даходзяць да сваякоў і сяброў.
Ацэньваючы вынікі галадоўкі, якая была для яго сур’ёзным выпрабаваннем, Уладзімір Мацкевіч кажа, што толькі дзякуючы шырокаму розгаласу і грамадскай падтрымцы зрухі сталі магчымыя. Адзіным месцам, дзе грамадскасць магла б даведвацца, у чым усё ж абвінавачваюць філософа, можа стаць заля суда — але мы ведаем пра шырокую практыку «закрытых судоў» па палітычных справах апошніх двух гадоў. Закрытымі робяць суды над вядомымі палітыкамі і праваабаронцамі, анархістамі і студэнтамі, мастакамі, журналістамі і блогерамі.
Дабіцца адкрытага суда — наступная задача, якую ставіць Уладзімір Мацкевіч.