Апошнім часам быць беларусам робіцца модным. І гэта не дзіўна! Багацце культуры, адметнасць традыцый, уменне шчыра і нейк па-добраму весяліцца вабіць і знаходзіць сабе прымянянне сёння. А найбольш – днямі каляднымі, калі прагнецца сапраўднага свята. Таму, стомленыя ад віртуальнай “Ёлачкі” і клікання “даслаць падарунак”, у пошуку рэальнага адчування, беларускія чараўнікі і чараўніцы падрыхтавалі для жыхароў горада Віцебска мадэрнова-традыцыйнае калдянае свята! А каб пазбавіцца ўзроставай дыскрымінацыі фармат зрабілі сямейным!
Спадары і спадарыні, мамы і таты, бабулі і дзядулі, маем гонар запрасіць вас на грандыёзны СЯМЕЙНЫ ФЭСТ! Такое адбываецца ў Віцебску ўпершыню! Ледзьве не на палову дня 11 студзеня (нядзеля) зала ў цэнтры “Задзвінне” ператворыцца ў казачную пляцоўку. Тут вас чакаюць цуды! Якія? Прабяжымся сцісленька па чарадзе падзеяў…
Аб 11-ай гадзіне ў цёплай ды ўтульнай драўлянай выставачнай зале распачне сваю працу кірмаш майстроў: дзіцячыя цацкі з дрэва і гліны, швэдры, шалікі, нататнічкі з беларускімі традыцыйнымі матывамі і арнаментамі, беларускія дзіцячыя кніжачкі і дыскі і шмат-шмат іншага. Тутака ж адначасова будуць зладжаныя два майстар-класы ад таленавітых віцебскіх творцаў-чараўнікоў: першы – для дзетак ад 5-ці год, другі – для тых” вялікіх” малых, каму ўжо споўніўся “пятачок”. Своеасаблівым падарункам для гасцей стане святочная фотазона ад студыі “Карамель”, якая будзе працаваць цягам усяго фэсту. Фатографы-прафесіяналы падораць вам на памяць здымак ва ўрачыстым і незвычайным антуражы! А ў зымправізаваным гульнявым куточку гасцей будуць чакаць беларускія традыцыйныя гульні і забаўкі.
І нарэшце кульмінацыя сямейнага свята: а 13-ай гадзіне загучыць музыка, заспяваюць галасы, затаньчуць дзіўныя людзі і звяркі – то значыць, што на свята завітаў непаўторны вандроўны аркестрык “ВУРАЙ” са сваёй каляднай праграмай для маленькіх і дарослых. Што тут пачнецца! Карагоды, спевы разам, скокі ды пабягушкі, танчыкі з Козачкай, уцёкі ад сапраўднага Мядзведзіка – карацей, усё тое, на што багатая нашая беларуская традыцыя, прыпраўленая густоўнай музыкай! “Вурай” падорыць нам амаль 2 гадзіны незабыўнага часу. Але свята працягнецца і апасля, і тыя, хто не паспеў нечыму навучыцца, у штось пагуляцца, ці проста пацікаваць на мастацкія здольнасці нашых творцай можа застацца з намі да паловы на чацьвёртую. Уваходныя запрашальныя на падзею ўжо ў наяўнасці і чакаюць на вас! Не прамініце! Гэта свята, якое ствараецца добрымі людзьмі дзеля самога свята і дзеля вашага настрою! Фэст адбываецца ў межах праекту “Забаўлянкі для Янкі” супольна з грамадскай культурніцкай кампаніі “Будзьма”. Па інфармацыю наконт запрашальных і ўласна падзеі зазірайце ў суполку фэсту. А таксама тэлефануйце арганізатарам па тэлефоне + 375 33 380 81 25 (Ганна). Прыходзьце сем’ямі, апранайце казачныя строі ці беларускія вышыванкі, прыносьце сваю ахвоту і натхненне – і мы падорым сабе паў-дні сапраўднага сучаснага беларускага свята!
