Вялікі дзякуй шаноўным удзельнікам віктарыны да Дня ведаў!
Кампанія “Будзьма беларусамі!” шчыра ўсцешана вашай надзвычайнай актыўнасцю і дасканалымі ведамі ў галіне айчыннага кнігадруку! Мы падвялі вынікі і гатовыя ўзнагародзіць пераможцаў эксклюзіўнымі падарункамі .
Дызайн – Анатоль Лазар
Першымі трыма ўдзельнікамі, якія хутчэй за ўсіх даслалі правільныя адказы і атрымліваюць спецыяльна зробленыя для кампаніі “Пяцісотгоднасць” цішоткі, сталі:
– Raman Patapčuk
– Наталька Кудзенька
– Andrej Buka
Таксама сем чалавек атрымаюць торбы з не менш прыгожым дызайнам:
– yarmolkevich_daniil
– Antoś Ułasienka
– Вікторыя Міхнюк
– bika88@tut.by
– Ігар, xyxjluk@tut.by
– Марыя Бадзей
– Siarhiej Jemialjanau
Віншуем!
Шаноўныя пераможцы, неўзабаве мы звяжамся з вамі і паведамім, як можна атрымаць прызы!
А цяпер увага! Правільныя адказы віктарыны ад “Будзьма!”:
Пытанне 1
На самых вядомых выявах нашых асветнікаў першадрукара Францыска Скарыну мы бачым у яго “працоўным кабінеце”, Ефрасінню Полацкую — з крыжам і заснаваным ёй храмам, а дзе мы бачым друкара Сымона Буднага?
Адказ: У пекле.
Пытанне 2
Кніга гэтага беларускага князя сталася сапраўдным бестселерам “травелогу” ХVII ст., вытрымаўшы каля двух дзясяткаў перавыданняў, і распавядала пра ўсё: ад кракадзілаў і вярблюдаў да муміяў і пірамідаў. Назавіце кнігу і аўтара.
Адказ: “Перэгрынацыя, або Паломніцтва ў Святую зямлю”, Мікалай Крыштаф Радзівіл Сіротка.
Пытанне 3
Пісьменнікі часцей за ўсё ледзь не кожным сваім творам так ці інакш сцвярджаюць сваю прысутнасць у свеце і літаратуры. Першая ж кніга гэтага беларускага аўтара сцвярджае адваротнае. Назавіце кнігу і аўтара.
Адказ: “Мяне няма. Роздум на руінах чалавека”, Валянцін Акудовіч.
Пытанне 4
Вядомы крытык Леў Клейнбарт у 1913 годзе прынёс свайму сябру, доктару і мецэнату, два рукапісы. Мецэнат зрабіў свой выбар не на карысць выдання кнігі “Радаўніца” паэта Сяргея Ясеніна, а выдаў кнігу беларускага паэта. Назавіце паэта і кнігу.
Адказ: Янка Купала,”Шляхам Жыцця”.
Пытанне 5
Кніга гэтага беларускага класіка ХІХ ст. прайшла царскую цэнзуру і была надрукаваная толькі дзякуючы таму, што была прадстаўленая цэнзарам як напісаная на балгарскай мове. Чыя гэта кніга і як яна называецца?
Адказ: Янка Лучына, “Вязанка”
Пытанне 6
Твор спецыялізаванай літаратуры, папулярны ў Рэчы Паспалітай амаль тры стагоддзі, быў своеасаблівай ілюстраванай энцыклапедыяй па ўтрыманні, выкарыстанні, сервісным абслугоўванні і гадаванні папулярнага тады транспартнага сродку. Назавіце кнігу.
Адказ: “Гіпіка, альбо Кніга пра коней”
Пытанне 7
Адны кнігі знішчаюць самі аўтары, некаторыя “рэжуць” цэнзары, штосьці дзесяцігоддзямі ляжыць у шуфлядах, а што здарылася з рукапісам праграмнай паэмы Якуба Коласа ўлетку 1924 года?
Адказ: Рукапіс паэмы “Сымон-музыка” быў скрадзены, калі Якуб Колас вяртаўся з адпачынку.
Яшчэ раз шчыра віншуем пераможцаў!
