Віртуальны Універсітэт Залатога Веку — гэта адукацыйная пляцоўка для сталых людзей і людзей іншых пакаленняў, якія імкнуцца атрымліваць важныя для жыцця ў сучасным грамадстве веды і ўменні, развівацца і самарэалізоўвацца, быць карыснымі грамадству. Праект паспяхова працуе два гады і ўжо аб’яўляе новы набор выкладчыкаў і студэнтаў. Даведаліся, каго шукаюць і якія курсы рыхтуюцца для новага сезона.
Як узнік ВУЗВ і якая мэта праекта?
На гэтай пляцоўцы працуюць анлайн-курсы, змешчаныя запісы вэбінараў і прамыя трансляцыі розных адукацыйных мерапрыемстваў, карысныя відэа і публікацыі, а таксама навіны пра розныя адукацыйныя магчымасці.
Ідэя стварэння Віртуальнага Універсітэта з’явілася ледзь не з самага пачатку ўзнікнення «Універсітэта Залатога Веку» (дзейнічае з 2010 г.), але арганізатары доўга з-за недахопу часу і рэсурсаў адкладалі ідэю «на потым».
Пандэмія каронавіруса, якая прымусіла арганізатараў перавесці вясной 2020 года ўсе навучальныя праграмы для сталых людзей у анлайн-фармат, прыспешыла працу па стварэнні Віртуальнага ўніверсітэта, які дзейнічае паспяхова ўжо два гады як асобны кірунак працы «Універсітэта Залатога Веку».
«Мы спадзяемся, што наведвальнікамі Віртуальнага УЗВ стануць не толькі тыя, хто наведвае стацыянарныя заняткі нашых курсаў і клубаў, але і іншыя сталыя людзі і людзі іншых пакаленняў — у тым ліку з мясцовасцяў, дзе пакуль няма альбо не хапае адукацыйна-асветніцкіх пляцовак для сталых людзей.
Мы робім гэтую працу з верай у тое, што сталыя людзі, як і людзі іншых пакаленняў, заслугоўваюць годнага жыцця і што адукацыя з’яўляецца адным з чыннікаў, якія могуць станоўча паўплываць на якасць жыцця чалавека на працягу ўсяго яго жыцця» — заяўляюць арганізатары ВУЗВ.
Каго шукаюць і якія курсы рыхтуюць?
Да супрацы запрашаюцца лектары/-кі адкрытых анлайн-лекцый і курсаў.
Тэмы могуць быць самыя розныя і ўкладацца, напрыклад, у наступныя дысцыпліны: мастацтва, кіно, гісторыя, адукацыя, здаровы лад жыцця, падарожжа, псіхалогія, інфармацыйныя тэхналогіі і фінансы і г.д.
Дэдлайн на падачу заявак — 15 верасня. Падаць заяўку можна па спасылцы.
За анонсамі лекцый сачыце на старонцы ВУЗВ.
