Дырэктар недзяржаўнага выдавецтва «Кнігазбор» Генадзь Вінярскі здаў пасведчанне выдаўца ў Міністэрства інфармацыі. Кнігі выдавецтва яшчэ можна купіць у беларускіх інтэрнэт-крамах і звычайных кнігарнях.

«Вось і скочылася мая эпапея выдаўца. 27 гадоў працы, каля 3 тысяч найменняў кніг, сустрэчы з аўтарамі, прэзентацыі, выставы... Сёння здаў у Міністэрства інфармацыі пасведчанне выдаўца, — напісаў Генадзь Вінярскі на сваёй старонцы ў Facebook. — У хуткім часе пачнем працэс ліквідацыі ПУП «Кнігазбор», таму купляйце ў кнігарнях кнігі нашага выдавецтва. Пакуль яны ёсць у інтэрнэт-кнігарнях: knihi.by, tn.by, kniganosha.by, а таксама ў Кніжнай шафе ды ў іншых кнігарнях».

Міжнародны фонд «Беларускі кнігазбор» быў заснаваны у 1995 годзе беларускімі дзеячамі культуры і навукі. Мэтай ставіўся збор матэрыялаў і падрыхтоўка да друку 200-томнага кніжнага праекта «Беларускі кнігазбор» — гэтую ідэю распрацаваў гісторык, пісьменнік і літаратуразнаўца Кастусь Цвірка. У 2006 годзе з прычыны зменаў у заканадаўстве міжнародны фонд пераўтварыўся ў самастойнае выдавецтва «Кнігазбор», якое ўзначаліў Генадзь Вінярскі.

Міністэрства інфармацыі двойчы прыпыняла ліцэнзію «Кнігазбора». У студзені 2021 года Дэпартамент фінансавых расследаванняў Камітэта дзяржаўнага кантролю заблакаваў рахунак, але летам доступ да рахунку быў адноўлены.

Штогод у «Кнігазборы» выходзіла каля ста найменаванняў кніг.

Сумесна з партнерамі — ГА «Саюз беларускіх пісьменнікаў» і МГА «Згуртаванне Беларусаў свету «Бацькаўшчына» — выдаваліся серыі кніг «Кнігарня пісьменніка», «Каляровы ровар», «Бібліятэка Бацькаўшчыны».

Кнігі выдавецтва неаднаразова прызнаваліся найлепшымі ў Беларусі ў розных намінацыях.