6 і 8 лютага 2016 года адбылася сустрэча з паэтэсай Верай Буланда ў Мсціжскай і Зембінскай сярэдніх школах Барысаўскага раёна Мінскай вобласці.

Мсціж – гэта радзіма паэтэсы, “першая сталіца яе лёсу”, і таму на вечары сустрэчы выпускнікоў яна не прамінула прачытаць радкі, з якімі звярнулася да землякоў:

Люблю вас, мае вяскоўцы,

Я вамі жыву, землякі,

Ці ў плюсаўцы вы, ці ў ватоўцы,

Убор – усё роўна які.

 

Вы мне даражэйшымі сталі

Праз зімы, дарогі, дажджы,

Хачу, каб не паміралі,

Каб з вамі яшчэ пажыць.

 

Каб з вамі назначыць спатканне

І сёлета, і на гады.

Мсціжане мае, Мсціжане,

Вы ў сэрцы маім заўжды.

У час сустрэчы спадарыня Вера арганізавала конкурс на веданне-ўспамін са школьнай праграмы вершаў, баек, алфавіту, назваў месяцаў па-беларуску.

Адказваючы на пытанні вучняў і настаўнікаў, Вера Буланда не прамінула распавесці, што такое для яе ПАЭЗІЯ:

Паэзія – мая гаспода, і мой храм,

Дзявочая святая летуценнасць,

Даверлівасць прагнозам і вятрам,

Што сталі назаўжды няўлоўным ценем.

Землякам таксама было цікава, як узнікаюць вершы, як думаюцца яны, ці заўсёды толькі натхненне – прычына нараджэння вершаў, ці яшчэ якія сакрэты ўтойваюцца ў паэтычнай душы. У час гутаркі не толькі чыталіся вершы, але і спяваліся песні.

Спадарыня прачытала нямала вершаў з новага зборніка “Сараматніца”, з кніг “Шчырая споведзь мая”, “Цыганскія кастры”, гумарэскі, у аснову якіх леглі гісторыі, звязаныя з аднавяскоўцамі.

Ад кампаніі “Будзьма беларусамі!” актыўныя вучні і дарослыя атрымалі падарункі: паштоўкі “Соты раз у першы клас”, торбачкі з выявай беларускага алфавіту.

Тэгі: Барысаўшчына