Калі звярнуць у нетры Вілейскага раёна, абавязкова патрапіце ў «занямоглыя» вёскі, дзе як быццам спыніўся час, піша kraj.by.
Гэта Губы. Не тыя, пра якія вы падумалі. У спісе айконімаў Вілейскага раёна «губа» ў старарускай мове гэта — акруга, Губы трэба прамаўляць з націскам на апошні склад, папраўляюць гісторыкі.
Не знікнуць з карт вёсцы дапамагаюць дачнікі. Вось яна — апошняя надзея былой дзяржавы ў Ашмянскім павеце.
Незвычайны дом № 31 на адзінай у вёсцы вуліцы застыў на павароце недалёка ад густога лесу. Спачатку нас сустрэў пластыкавы персанаж з просьбай не смеціць. А далей — суцэльнае добраўпарадкаванне. Гаспадароў дома не заспелі. Мясцовыя расказалі, што жывуць тут мінчане-медыкі «ў адстаўцы».
За плотам мільгаюць сілуэты ў чалавечы рост. Мы патрапілі сюды ў прыцемкі, прызнацца сапраўды, на фоне бязлюднай вёскі міжволі адчуваецца шпацыр па мясцовасці ў жанры фолк-хорар.
Зрэшты, лепш убачыць.
Жыхары суседніх вёсак, да якіх рукой падаць, расказалі, што ў Губах цячэ цудатворная крыніца, якая вылечвае ад хвароб вочы. А яшчэ ў вёсцы нарадзіўся беларускі пісьменнік Касьян Вясёлы, ён жа — Вікенцій Аўдзей.
Цікава, што ў 1800 годзе Губы былі цэнтрам стараства з панскім драўляным домам і пяццю жыхарамі. У 2003 годзе тут налічвалася 17 дамоў і 25 жыхароў. А паводле афіцыйных звестак Крывасельскага сельсавета, сёння ў вёсцы зарэгістраваны ўсяго адзін жыхар.
Марына Лебедзева, фота аўтара
