Адным з вынікаў узросту грамадзка-палітычнай актыўнасьці, які прывёў да беспрэцэдэнтных для Беларусі мірных пратэстаў у 2020 годзе, стала зьяўленьне шматлікіх непадцэнзурных крыніцаў інфармацыі на новых плятформах і ў новых фарматах, найперш — у тэлеграме.
Гэтыя матэрыялы зьяўляюцца асабліва ўразьлівымі: ім пагражае зьнішчэньне ў выніку рэпрэсіяў, самацэнзура або зьнікненьне з-за немагчымасьці бясьпечнага і стабільнага існаваньня.
Архіваваньнем трыццаці рэсурсаў — тэлеграм-каналаў і вэбсайтаў — пачалося партнэрства Беларускай бібліятэкі і музэя імя Францішка Скарыны і Канфэдэрацыі бібліятэкаў Лігі плюшча плюс (Ivy Plus Libraries Confederation) для разьвіцьця вэб архіву «Беларуская палітыка і грамадзтва».
Каб забясьпечыць бесьперапынную даступнасьць для дасьледчыкаў такіх эфэмэрных рэсурсаў, у верасьні 2020 году бібліятэкары Гарвардзкага, Стэнфардзкага і Чыкагскага ўнівэрсытэтаў, пад эгідай Канфэдэрацыі бібліятэкаў Лігі плюшча плюс, пачалі іх сыстэматычнае архіваваньне ў рамках вэб-архіву «Беларуская палітыка і грамадзтва».
Фокус архіву — дзейнасьць групаў і арганізацыяў, апазыцыйных уладам, а таксама няўрадавых арганізацыяў, мясцовых СМІ, прафсаюзаў, культурніцкіх арганізацыяў, асобных палітыкаў і дзеячаў культуры.
Для стварэньня вэб-архіву «Беларуская палітыка і грамадзтва» Канфэдэрацыя бібліятэкаў Лігі плюшча плюс выкарыстоўвае перадавыя тэхналёгіі вэб-архіваваньня, створаныя каліфарнійскім Інтэрнэт Архівам (Internet Archive).
Зьмест вэб-архіву «Беларуская палітыка і грамадзтва» аўтаматычна становіцца даступным у на плятформе Інтэрнэт Архіву — самай вялікай у сьвеце дыгітальнай бібліятэкі, адкрытай для кожнага чалавека задарма. Зьмест вэб-архіву «Беларуская палітыка і грамадзтва» індэксуецца для поўнатэкставага пошуку, а крыніцы забясьпечваюцца англамоўным бібліяграфічным апісаньнем для больш хуткай і лёгкай навігацыі.
Цяпер падрыхтаваныя для захаваньня ў вэб-архіве «Беларуская палітыка і грамадзтва» наступныя 60 крыніцаў: тэлеграм-каналы, вэбсайты і ютуб-відэа. У будучыні плянуецца архіваваць як мінімум адну крыніцу ў дзень: ад простых відэа да шматстаронкавых сайтаў і Тэлеграм-каналаў.
Любы чалавек можа прапанаваць рэсурсы (напр. тэлеграм-каналы, вэбсайты і ютуб відэа) для ўключэньня ў вэб-архіў «Беларуская палітыка і грамадзтва» з дапамогай электроннай формы.
