Сёння, 19студзеня, адзначаецца Вадохрышча. У гэты дзень традыцыйна шмат жадаючых акунуцца ў палонку. Спецыяліст нагадаў, як рабіць гэта правільна, каб пазбегнуць непрыемных наступстваў.
Начальнік аддзела арганізацыі медыцынскай абароны пры надзвычайных сітуацыях Міністэрства аховы здароўя Аляксандр Панцюхоў адзначыў, што вельмі важна добра падрыхтавацца да купання, піша БЕЛТА.
Карысныя парады
«Перад тым як акунуцца ў ваду, будзе карысна разагрэць сваё цела - зрабіць фізічныя практыкаванні. Памятайце, што ў месцах акунання дастаткова слізка, таму перад выхадам з дома паклапаціцеся аб гумавых тапачках», - сказаў Аляксандр Панцюхоў.
Апускацца ў палонку трэба вертыкальна і без скачкоў убок, зазначыў ён.
«Як правіла, чалавек акунаецца з заплюшчанымі вачыма. Бывае, што ён можа перамясціцца пад лёд і крыху праплысці. Тады пры ўсплыванні ёсць верагоднасць стукнуцца галавой аб лёд. Тут і пачынаецца паніка і лішнія дзеянні», - дадаў прадстаўнік Міністэрства аховы здароўя.
Паводле яго слоў, купанні ў неабсталяваных месцах немэтазгодныя.
«Няма гарантыі, што вы не паслізнецеся, не стукнецеся ці ў вас не будзе курчаў. Гэта датычыцца нават тых, хто “маржуецца”. Так што ў ваду апускаемся плаўна і стараемся не мачыць галаву. Усё ж такі наш мозг адмоўна ставіцца да такіх мерапрыемстваў. "Змена яго ўсяго толькі на 0,1 градуса можа прывесці да негатыўных наступстваў аж да непрытомнасці. Дарэчы, мокрыя валасы - дадатковы фактар пераахалоджання», - падкрэсліў Аляксандр Панцюхоў.
«Звярніце ўвагу, што побач могуць купацца дзеці. Нават калі яны трэніраваныя, усё роўна дарослыя павінны знаходзіцца побач, - падкрэсліў начальнік аддзела. - Першая задача пасля акунанняў - як мага хутчэй сагрэцца. Назапасьцеся ручнікамі, гарачай гарбатай у тэрмасе. Гэта дапаможа паскорыць працэс сагравання цела».
Супрацьпаказанні
Аляксандр Панцюхоў нагадаў, што ёсць некаторыя супрацьпаказанні для купання ў палонцы.
Самае простае - калі вы адчуваеце нават лёгкае недамаганне, лепш устрымацца ад купанняў.
«Сюды адносяцца ўсе абвастрэнні хранічных захворванняў - паражэнне каляносавых пазух, атыты, выяўленыя захворванні сардэчна-сасудзістай сістэмы, у тым ліку ішэмічная хвароба, перанесеныя інфаркты міякарда, кардыясклерозы, гіпертанічная хвароба 2-3 стадыі, захворванні цэнтральнай нервовай сістэмы. Варта ўстрымацца ад купанняў і людзям з захворваннямі эндакрыннай сістэмы (цукровым дыябетам, тырэятаксікозам), пры захворваннях вачэй (глаукома, кан'юктывіт), лёгкіх (сухоты, бранхіяльная астма), мочапалавой сістэмы і захворванняў ЖКТ (язвавая хвароба) і іншых», - заключыў ён.
