22 чэрвеня скончыўся збор сродкаў на праект, так што ў Мінску пройдзе фотавыстава фатографкі, якая сама і займалася кампаніяй на “Вуллі”.
“Звычайна пасты пра бяздомных жывёл ціснуць на жаль. А гэтага жалю і так багата ў жыцці. Я хацела паказаць станоўчы бок, падзяліцца пазітывам”, — распавядае аўтарка праекта “Путешествие домой” Аляксандра Пяхота.
Аляксандра доўгі час валанцёрыць дзеля ўладкавання жывёл у новых гаспадароў, яна здымае катоў на ператрымках і за тры гады сфатаграфавала каля тысячы жывёл і назбірала багата шчаслівых гісторый. “Жыццё змяняецца не толькі ў тых, хто ўзяў сабе жывёлу, але і ў тых, хто неяк спрычыніўся да гэтага працэсу”, — адзначыла яна.
Аляксандра вырашыла зладзіць фотавыставу не жаласных, а ўжо хатніх катоў, каб паказаць людзям, што нястрашна браць бяздомных жывёл з вуліцы або прытулку, што кожная жывёла прыгожая і ўнікальная, хоць і не мае ў пашпарце “пароды”. Толькі яна не ведала, як на гэта можна сабраць грошы: “Мне падказаў сябрук Міця, які збіраў на карціну Хруцкага. Ён распавёў, што на сайце ўсё прапісана, а калі што, то дапаможа менеджар”.
Але і пасля гэтага ў Аляксандры было шмат хваляванняў і сумневаў: “У першы ж тыдзень на рахунак прыйшло многа грошай. Людзі так хутка адгукнуліся, што я нават не чакала”. Так дзякуючы 76 фундатарам праект сабраў 11 255 000 рублёў.
Цалкам суму атрымалася сабраць за 20 дзён, і цяпер ідзе падрыхтоўка да выставы, што адкрыецца ў Музеі прыроды і экалогіі (філіял Нацыянальнага гістарычнага музея Рэспублікі Беларусь) на Карла Маркса, 12.
“Цягам кампаніі я атрымала надзвычайны імпульс ад людзей. Атрымалася не толькі сабраць грошы, але і паведаміць людзям пра выставу. І хоць ніхто не захацеў узяць сабе новую жывёлу, людзі пісалі, што мая ідэя ім даспадобы. Некаторыя адмаўляліся ад падарункаў, а іншым спадабалася прапанова зладзіць фотасэт для іх гадаванца”, — распавяла Аляксандра.
У якасці ўнікальных падарункаў за падтрымку бэйкеры атрымаюць магніты, паштоўкі, партрэты жывёлаў, а яшчэ багата пазітыву, бо ўсім вядомая любоў людзей да катоў і сабак. А на выставе такіх эмоцый будзе шмат.
Надалей фатографка плануе адкрыць студыю для здымкаў жывёл: “Праўда, гэта яшчэ далёкая будучыня”.
Напрыканцы Аляксандра параіла ўсім, хто мае цікавыя ідэі, не баяцца прапаноўваць іх грамадству. “Можна не толькі атрымаць фінансавую падтрымку, але і моцны эмацыйны імпульс. Складана сказаць, што з гэтага больш каштоўнае”, — прызналася яна.
Марыя Грыц
