У дабрачыннай акцыі “Смачна есці ў хату” эксперты беларускай кухні навучаюць дзетак гатаваць розныя стравы, пакуль іх бацькі сыходзяць на спатканне.

Працуе гэта так: кухары і валанцёры прыходзяць у сям’ю, распавядаюць дзецям пра звычаі былых часоў, пра ежу і традыцыі, вучаць рэзаць і не парэзацца, варыць і не апячыся і г.д. Таксама ёсць і выхаваўчы складнік: дзеці павінныя маўчаць, калі гаворыць кухар, а на покліч “Каманда!” яны хорам адказваюць “Так, шэф!”

Майстры паказваюць паслядоўнасць дзеянняў, вучаць сервіроўцы, дапамагаюць накрыць на стол і сыходзяць раней за вяртанне бацькоў, каб не замінаць сямейнай атмасферы вечара. Валанцёры тым часам таксама пераймаюць сакрэты майстэрства, а наступным разам ужо самі выступаюць галоўнымі на кухні і маюць ўжо сваіх валанцёраў. Тым часам бацькі маюць выдатны шанец прабавіць час разам, пакуль дома для іх рыхтуюць смачную вячэру.

Адбываецца такая падзея раз на два тыдні. Тэарэтычна. Насамрэч удзельнікі могуць ладзіць такія вечары з дзецьмі і часцей – гэта іх жаданне. Вядомы эксперт беларускай кухні і суарганізатар падзеі Алена Мікульчык адзначыла, што праект не мае нейкага тэрміну: “Праз пэўны час мы памяняем склад меню, каб людзям было цікавей удзельнічаць у праекце”. Яна таксама падкрэсліла, што на сёння “Смачна есці ў хату” разлічаны толькі на вялікія сем’і дзе ёсць выхаванцы з інтэрнатаў. “Мы хочам такім чынам дапамагчы бацькам і даць ім некалькі гадзін на ўласнае жыццё”, – адзначыла Алена.

Кухары займаюцца з дзеткамі бясплатна, але прадукты набываюць сем’і. З кожным разам колькасць дамоў, куды завітаюць аматары нацыянальнай кухні, будзе павялічвацца. Вырасце і геаграфія праекта, бо ўжо ёсць валанцёры з іншых гарадоў, якія выказалі жаданне ўзяць удзел у мінскіх кухонных сустрэчах, а пасля ладзіць такія ж на сваёй малой радзіме. Такім чынам нацыянальная кухня стане больш народнай і, як спадзяюцца арганізатары, больш папулярнай.

Ініцыявала акцыю група валанцёраў “Свята ў кожнае сэрца”, а падтрымалі выбітныя кухары і эксперты Вячаслаў Гарбатаў, Андрэй Рэзнікаў, Алена Мікульчык. У кожнага з іх аднолькавы склад прадуктаў, меню і спосабы гатавання. Іх эксперты спецыяльна выпрацавалі, каб дзецям было цікава і нескладана. Праўда, кухары-пачаткоўцы не баяцца цяжкіх задач і добра спраўляюцца з прыборамі і тэхнікай.

Адной з першых сем’яў, што прымалі ў сябе “Смачна есці ў хату”, былі Янкоўскія. У іх 9 дзяцей, але кожны знайшоў сабе карысную справу на кухні, пакуль бацькі бавілі вечар на пастаноўцы ў Купалаўскім тэатры. Цікава, што некаторыя з дзетак ужо што-нішто ведалі пра гатаванне, бо сустракаліся з кухарамі ў інтэрнаце ў Ашмянах.

Як адзначылі арганізатары, да праекта ў якасці валанцёра ці сям’і, што прымае кухараў, можа далучыцца кожны. Для гэтага варта звярнуцца да Алены Мікульчык і даведацца пра найбліжэйшыя планы акцыі.

Марыя Грыц