Алесь Тодараў на budzma.org расказвае аб тым, як пачаць працаваць больш эфектыўна і пры гэтым менш стамляцца.
Многія офісныя працаўнікі часта заўважаюць за сабой, што пачынаюць вельмі хутка стамляцца. Прычым гэта рэдка звязана з тым, што дзень сапраўды быў насычаным. Звычайна такая стомленасць ніяк не звязана з фізічнай.
Спачатку варта разабрацца, ад чаго ўзнікае такая «стомленасць». Звычайна гэта адбываецца ад вялікай колькасці няскончаных задач. Гэта значыць, не ад тых спраў, якія вы зрабілі, бо яны наадварот прыносяць энергію. Але ад тых задач, якія мёртвым грузам вісяць на вас, і вы не можаце ці не хочаце прыступіць да іх выканання. Такім чынам яны забіраюць ільвіную долю вашай увагі, канцэнтрацыі і, як следства, сіл.
Вашая эфектыўнасць у такіх выпадках таксама пачынае моцна кульгаць з-за таго, што па факце, выконваючы якую-небудзь задачу, вы не канцэнтруецеся толькі на ёй, а абдумваеце ці проста трымаеце ў галаве яшчэ і іншыя задачы.
Каб павысіць сваю эфектыўнасць і менш стамляцца, трэба зрабіць наступнае:
Выпішыце па максімуме ўсе свае незавершаныя задачы, задумы і нават ідэі на паперу. Нічога не пакідайце ў галаве. Самі пабачыце, што гэта імгненна дасць эфект, вам стане лягчэй. Бо ўжо не давядзецца думаць пра гэта ўвесь час, каб не забыцца.
Цяпер трэба прыступіць да выканання гэтых задач. Тут без планавання не абысціся. Складаем спіс на дзень і ацэньваем кожную задачу па часе. У першую чаргу робім тыя, якія даўжэй за ўсё чакаюць. І па прыярытэтах.
Чытайце таксама: Як перастаць мроіць і пачаць планаваць?
Калі вы прыступіце да працы над задачамі — звярнеце ўвагу на свае думкі. Ваша мэта — навучыцца, выконваючы якую-небудзь працу, цалкам занурацца ў яе і выконваць, не рассейваць увагу, лётаючы думкамі дзесьці ў іншым месцы або дазваляючы ім з’яўляцца і адцягваць вас. Поўнае занурванне ў задачу забяспечвае эфектыўнае і больш якаснае яе выкананне.
Увядзіце ў сябе ў кампаніі пісьмовую камунікацыю. Намалюем стандартную карціну: 30 хвілін вы аналізуеце паказчыкі мінулага месяца/фінансы/складаеце прэзентацыю і гэтак далей, тут да вас падыходзіць то адзін калега, то іншы з якім-небудзь «вельмі важным» пытаннем/задачай. Па-першае, вам патрабуецца час, каб думкамі выйсці з аналізу, які вы толькі што рабілі, усвядоміць што ад вас хочуць, слушна ўспрыняць інфармацыю, а магчыма, яшчэ і вырашыць праблему.
Заўсёды памятайце аб тым, што незавершаная праца адцягвае вашу ўвагу на сябе — і вы робіцеся не такім эфектыўным, як маглі б быць. Па-другое, вам патрэбны час, каб зноў пагрузіцца ў аналіз дадзеных, які вы да гэтага рабілі, тут мы можам адзначыць каштоўны час, які патрачаны марна.
Падвышайце ўласную кампетэнтнасць, увесь час навучайцеся. Рух — жыццё, гэта вядома кожнаму. А што за гэтым стаіць? Пастаянна атрымліваючы новыя веды і навыкі, вы становіцеся ўсё больш кампетэнтнымі ў сваёй справе. Згадайце, калі вы першы раз стажыраваліся, шмат якія рэчы вы рабілі нашмат даўжэй, чым пасля практыкі. Тое ж самае і тут: чым больш вы навучаецеся, тым больш вы развіваецеся як прафесіянал і больш эфектыўна спраўляецеся з любой, нават самай цяжкой і невырашальнай задачай. Як толькі вы перастаеце атрымліваць новыя веды, вы закісаеце, апускаецеся ў балота і робіцеся ўсё менш і менш эфектыўным. Ні ў якім разе не варта дапускаць такой сітуацыі. Развівайцеся!
Прадуктыўнасці можна дасягнуць, толькі мэтанакіравана працуючы над гэтым!
Калі кожную раніцу ў вас будзе ясная мэта, да выканання якой можна адразу ж прыступіць, вашая здольнасць да факусіроўкі і канцэнтрацыі шматкроць узрасце. Таму праводзьце апошнія 20 хвілін кожнага дня, абдумваючы задачы на заўтра і расстаўляючы прыярытэты. І сканцэнтруйце сваю энергію на дасягненні пастаўленых мэт, як толькі ўстанеце наступнай раніцай.
Вы павінны прызвычаіцца да таго, каб вырашаць самыя складаныя задачы на дзень у першыя 90 хвілін, давёўшы такі распарадак да аўтаматызму. Тады вам не спатрэбіцца вялікіх выдаткаў энергіі і жорсткай самадысцыпліны, і вы сапраўды зможаце дамагацца максімальных вынікаў.
Чытайце таксама: Пяць парадаў, як зрабіць свой ранак сапраўды добрым
Вось яшчэ жменька парадаў, якія таксама могуць прыдасца і з якіх, пэўна, варта пачынаць:
1. Не адмаўляйце свой хранатып
Прабачце сябе за тое, што не можаце заснуць а дзесятай вечара або ўстаць а сёмай раніцы. Гэта не так і проста, бо мы з дзяцінства прывыкаем да думкі, што людзі, якія так робяць, лянівыя і безадказныя. Усё гэта гучыць як клішэ, але калі вы не прымеце сябе і не паверыце ў сваю каштоўнасць і здольнасці, іншыя таксама не павераць.
2. Плануйце дзень з вечара
Карысна будзе загадзя скласці план работы. Увечары ён дапаможа не адцягвацца і не пераскокваць ад адной задачы да іншай, а ў пачатку дня — не адчуваць сябе вінаватым за тое, што марнуеце час на нейкія іншыя клопаты.
3. Стварыце зручны ранішні распарадак
Калі вы прачынаецеся да поўдня, гэта яшчэ не значыць, што першую гадзіну не трэба прысвяціць клопату пра сябе. Абярыце некалькі заняткаў, якія зараджаюць вас энергіяй і дапамагаюць здабыць патрэбны настрой. Паспрабуйце — і здзівіцеся, наколькі гэта проста і зручна!
Алесь Тодараў, budzma.org
