Алесь Тодараў на budzma.org разважае аб тым, як нарэшце пазбавіцца ад летуценняў ды стаць эфектыўным практыкам.
Чым мара адрозніваецца ад планавання? Мара не прадугледжвае дзеянняў. Гэта проста «жадаю» без уліку магчымых пабочных эфектаў і наступстваў.
Але як толькі летуценнік сутыкаецца са складанасцямі, першапачатковыя планы ўжо не здаюцца яму нечым прывабным. Мары заканчваюцца расчараваннем.
Каб перайсці ад летуценняў да канструктыўных дзеянняў неабходна выканаць наступнае даволі простае і разам з тым вельмі складанае практыкаванне.
Трэба ўзяць аркуш паперы і напісаць на ім тры пазіцыі:
— Дакладную мэту, да якой хочаш прыйсці праз год.
— Што ты атрымаеш пасля рэалізацыі гэтай мэты, што будзеш адчуваць, што з табой адбудзецца.
— На што табе давядзецца пайсці для дасягнення мэты, чым ахвяраваць — часам, сіламі, грашыма, адносінамі.
Пасля трэба распісаць пакрокавы план, каб зразумець, ці рэальны ўстаноўлены тэрмін. У працэсе руху па плане, набліжай або аддаляй устаноўленыя тэрміны.
Калі прасоўванне па плане ідзе занадта лёгка — варта наблізіць дату. Калі занадта складана — аддаліць яе, каб наогул не страціць цікавасць і не кінуць усё.
Стаўце перад сабой толькі выразныя мэты
Часцяком мы не маем выразнага вобразу мэты. Замест яго — толькі расплывістыя ідэі накшталт стаць «лепшым», «паспяховым», «зграбным і прыгажэйшым». Або зусім смутныя і не вельмі рэалістычныя фантазіі: выходжу прыгожы і шыкоўна апрануты з дарагога аўтамабіля, а ўсе вакол паміраюць ад зайздрасці і захаплення.
Калі мы не ведаем, да чаго канкрэтна імкнемся, і не можам адэкватна ацаніць свае магчымасці, нам не хопіць матывацыі, і прыйсці да поспеху будзе цяжка.
Вельмі важна мець выразную мэту і яркую карцінку ў галаве, ілюстрацыю да гэтай мэты. «Я хачу ведаць англійскую на ўзроўні proficiency, каб атрымаць працу за мяжой» — гучыць вельмі добра, але не надта натхняльна. А вось выява, як вы ідзеце з кубкам кавы па галоўным офісе Google і вітаецеся з калегамі, матывуе куды лепш.
Даследаванні паказваюць, што візуалізацыя мэты дапамагае яе дасягнуць. І яшчэ — чым лягчэй уявіць сабе жаданае, тым больш шанцаў не страціць матывацыю.
Вырашыце, кім вы хочаце быць
Выканайце яшчэ адно простае практыкаванне.
З дапамогай трох прыметнікаў апішыце, якім чалавекам вы хочаце быць. Магчыма, з часам вобраз будзе мяняцца, але сам факт яго наяўнасці вельмі важны: абраныя якасці паслужаць вам каштоўнасным арыенцірам і асновай для далейшых рашэнняў і ўчынкаў.
Быць можа, нейкія якасці будуць актуальныя толькі кароткі час, для канкрэтнай задачы ці мэты. Іншыя застануцца з вамі надоўга. Гэта ўжо вырашаць толькі вам. Дарэчы, прыметнікі неабавязкова павінны быць сур’ёзнымі. Магчыма, вы перажылі няпростыя часы, дык падніміце сабе настрой.
Падумайце, якім вы хочаце быць: пазітыўным, смелым, добрым, умелым, моцным, матываваным, спакойным, аптымістычным, мудрым, мяккім, шчырым, спачуваючым, адкрытым, эфектыўным, прыязным, актыўным, энергічным, цярплівым, шчаслівым, шчодрым, дысцыплінаваным, адказным, клапатлівым.
Дзейнічайце так, нібыта вы ўжо чалавек, якім бы вы хацелі стаць, і ў канчатковым выніку вы ім станеце.
Будзьце самі сабе маяком і арыенцірам!
Кожны дзень рабіце крок да поспеху
Завядзіце сабе за правіла — кожны дзень рабіць хаця б адзін крок, які будзе набліжаць вас да поспеху. Няхай гэта будзе справа на 5 хвілін, але не давайце сабе спуску. Нават калі гэта выходны і вам вельмі лянота — устаньце і зрабіце хаця б што-небудзь.
Нямецкі пісьменнік і мысляр Эрнст Юнгер у сваіх дзённіках пісаў:
«Калі класці па некалькі цаглін у дзень, то гадоў праз шэсцьдзесят-восемдзесят можна жыць у палацы»
І ён мае рацыю!
Мяркуйце самі: у годзе 365 дзён, калі кожны дзень рабіць хаця б па адным кроку, то гэта будзе 365 крокаў. Канешне ж, такі падыход няхай нават і павольна, але ўсё ж будзе набліжаць вас да мэты.
Не кіем, дык палкаю — як раней казалі на нашых землях.
Алесь Тодараў, budzma.org
