Ілюстратар Аляксей Кулінковіч малюе вельмі душэўны Мінск. І хоць, як прызнаецца сам аўтар, аналізаваць свае працы ён не любіць, за кожнай выявай — свая гісторыя любові да Мінска і людзей, — піша CityDog.
«Для мяне вельмі важныя два складнікі: візуал і ідэя»
Аляксей Кулінковіч, ілюстратар, вось ягоны instagram
— Я нарадзіўся і жыву ў Менску, малюю з дзяцінства. Па адукацыі — дызайнер інтэр’еру, але толькі па адукацыі (смяецца), скончыў Інстытут сучасных ведаў імя А. М. Шырокава. Больш свядома пачаў займацца малюнкам і жывапісам менавіта перад паступленнем. На апошнім курсе ў мяне з’явіўся графічны планшэт, і я з галавой паглыбищся у дыджытал-маляванне.
Пасля інстытута працаваў у студыі інтэр’ера ў свайго выкладчыка, пасля — у вэб-студыі і рэкламнай агенцыі. І заўсёды гэта быў вельмі класны і карысны досвед. Досыць доўгі час вучыўся рэкламнай рэтушы а-ля «Канскія львы», і ілюстрацыя троху сышла на другі план — дакладней, я займаўся і тым, і іншым раўназначна. Таму, напэўна, для мяне вельмі важныя два складнікі: не толькі сам візуал, але і ідэя.
Аб працах: «Часцей за ўсё натхняюць людзі, якіх я назіраю з вакна»
Серыяй назваць мае ілюстрацыі, вядома, складана, таму што ўсе яны крыху ў розных стылістыках. Наогул ідэя прыходзіць спантанна і вельмі банальна. Часцей за ўсё натхняюць людзі, якіх я назіраю з вакна. Так, напрыклад, здарылася з ілюстрацыямі «Трэба рабіць» і «Снежань».
Пра «Снежань»: «Патрэбны памагаты ў гэтай справе»
Гэтая праца завецца «Снежань». Такую карціну я назіраў з вакна: праўда, там была толькі адна бабулька. І падумаў, што ёй абавязкова патрэбны памагаты ў гэтай нялёгкай справе. А «Брама Мінска» з’явілася, каб дадаць крыху камічнасці сюжэту.
«Трэба рабiць»: «Таксама створана паводле сюжэта «з вакна»»
Спачатку я ўбачыў працоўнага ў куртцы «Мінскзелянбуда», які чысціў снег на ходніку, а потым спыніўся перадыхнуць. У гэты момант проста ўсплыла фраза, якую я сабе перыядычна паўтараў: «Што зробіш? Трэба рабіць!..» Пасля я шукаў у інтэрнэце рэферэнсы для ілюстрацыі па працоўным праекце (зараз я працую 2D-мастаком у прадуктовай IT-кампаніі) і напаткаў постэр Nike з іх слоганам Just do it.
І раптам падумаў, што «Трэба рабіць» — гэта ж наш Just do it. Хоць пераклад і не даслоўны.
Бусел у дваровым «глобусе»: «У нас у двары зносяць пляцоўку»
У нас у двары зносяць старую дзіцячую пляцоўку, на якой я правёў дзяцінства. Хацелася нейкую яе частку абавязкова захаваць. Потым прыйшла ў галаву думка, што я не вельмі часта падарожнічаю па свеце. Напэўна, так выглядаюць «мае вандраванні», ды і буслы таксама не заўсёды адлятаюць, а застаюцца на зімоўку.
Публікацыя ад Aleksey Kulinkovich (@klin_illustrator)
Hilton z buslami dla siabroŭki
Я гэтую карцінку першапачаткова маляваў сяброўцы, якая любіць такую архітэктуру. Яна з’яжджала ў іншую краіну, але неяк я не паспеў ілюстрацыю раздрукаваць. Таму не падараваў, а проста заліў у інсту.