Арганізацыйны камітэт абвяшчае збор заявак на стварэнне панэляў у межах IX-ага Міжнароднага Кангрэса даследчыкаў Беларусі. Кангрэс адбудзецца 1–3 кастрычніка 2021 года ў Коўне (Літва).
Панэлі могуць быць прысвечаны абмеркаванню асобных даследчых праблем ці прэзентацыі вынікаў навуковай дзейнасці ў межах асобных дысцыплін ці даследчых накірункаў. Пры падачы матэрыялаў арганізацыйны камітэт не ставіць дакладных тэматычных ці дысцыплінарных абмежаванняў, пакідаючы магчымасць прадстаўнікам акадэмічнай і экспертнай супольнасці самастойна артыкуляваць свае прыярытэты і зацікаўленасці.
Колькасць удзельнікаў на стадыі падачы таксама не абмежавана. Калі ўдзельнікаў будзе шмат, заяўленая панэль можа быць падзеленая на некалькі асобных панэляў і працаваць як асобная секцыя.
Арганізацыйны камітэт запрашае даследчыя арганізацыі і супольнасці, а таксама акадэмічных лідараў прыняць удзел у вызначэнні тэматычных прыярытэтаў наступнага Кангрэса.
Заяўка можа быць як калектыўнай, так і індывідуальнай. Заяўнікамі могуць асобы, а таксама зацікаўленыя інстытуцыі і арганізацыі.
Для падачы заяўкі да 1 красавіка 2021 года неабходна запоўніць анлайн-форму:
https://palityka.wufoo.com/forms/call-for-panels-2021/
Глядзіце прыклады назваў панэляў у праграмах Кангрэса 2019 года.
Дадатковыя пытанні можна задаць напісаўшы на пошту: icbs@palityka.org
З павагай, Арганізацыйны камітэт.
Арганізатарамі і партнёрамі Кангрэса выступаюць: Інстытут «Палітычная сфера» (Мінск), Інстытут Вялікага Княства Літоўскага (Каўнас), Беларуская асацыяцыя даследчых цэнтраў (Мінск), Універсітэт Вітаўта Вялікага (Каўнас, Вільня) і іншыя
Кангрэс з’яўляецца самай прадстаўнічай штогадовай акадэмічнай і экспертнай падзеяй, у працы якой бяруць удзел усе асноўныя інтэлектуальныя цэнтры даследавання палітыкі, грамадства і культуры Беларусі. Акрамя гэтага, правядзенне Кангрэса з’яўляецца выдатнай магчымасцю для распрацоўкі новых жыццяздольных даследчых і грамадскіх праектаў, абмену думкамі і ідэямі, ўсталявання нефармальных кантактаў з прадстаўнікамі экспертных і акадэмічных супольнасцяў Беларусі і іншых краін. Місія Кангрэса — развіццё супольнасці навукоўцаў, аналітыкаў і экспертаў, а таксама садзейнічанне больш глыбокаму разуменню Беларусі ў акадэмічным і грамадскім асяроддзі краіны, рэгіёну і свету.
Традыцыйна на Кангрэс збіраюцца звыш 500 навукоўцаў і экспертаў з Беларусі і замежжа, чакаюцца дыскусіі і прэзентацыі, а таксама наданне Прэміі за найлепшыя навуковыя публікацыі па выніках 2020 года.
