У Нацыянальнай акадэміі навук плануюць стварыць зборнік беларускіх народных казак. Аб гэтым заявіў старшыня Прэзідыума Нацыянальнай акадэміі навук Уладзімір Гусакоў на святочным навукова-практычным семінары «Калядныя цуды: легенды і казкі», піша Белта.
Фота з архіву
У сваім выступленні Уладзімір Гусакоў падкрэсліў, што казка — гэта не проста захапляльны расказ для дзяцей, але і старажытная культура, філасофія.
«Існуе мноства жанраў казак. Напрыклад, ёсць казкі пра жывёл, чараўніцтва, побыт і іншае. У Беларусі існуе 580 сюжэтаў казак, і гэта вельмі вялікае багацце для нашай краіны. У сувязі з гэтым ёсць ідэі па стварэнні зборніка, які аб’ядноўвае ўсе гэтыя сюжэты. Бо народны фальклор — гэта наша гістарычная спадчына, культура і выхаванне для будучых маладых пакаленняў», — адзначыў старшыня Прэзідыума Нацыянальнай акадэміі навук.
Ён дадаў, што стварэннем зборніка трэба заняцца як мага хутчэй. «Беларускія казкі заслугоўваюць таго, каб гаварыць аб іх асобна і грунтоўна», — падсумаваў Уладзімір Гусакоў.
