“Згуртаванне беларусаў свету “Бацькаўшчына” ў межах кампаніі “Будзьма” далучылася да агульнабеларускай грамадскай акцыі “Беларускую кнігу – дзецям!”, якая стартавала 1 верасня. Галоўная мэта акцыі – забяспечыць маладое пакаленне беларусаў друкаванымі выданнямі на беларускай мове, з дапамогай якіх яны могуць вывучаць гісторыю і культуру краіны, знаёміцца з творамі айчынных і замежных аўтараў сучаснай і класічнай літаратуры.

Па словах арганізатараў акцыі, менавіта творы, напісаныя на беларускай мове, могуць выхаваць сапраўдных патрыётаў краіны, бо “нацыянальныя каштоўнасці і традыцыі” ўспрымаюцца маладымі беларусамі толькі праз прызму нацыянальнага мастацтва і роднай мовы. На сённяшні дзень большасць адукацыйных установаў і бібліятэк не валодае ў дастатковай колькасці беларускамоўнымі творамі, што не спрыяе фармаванню незалежнага светапогляду маладых беларусаў.

Акцыя “Беларускую кнігу – дзецям!” стартавала ў Салігорску і праходзіць у 18 гарадах Беларусі. Атрыманыя кнігі арганізатары акцыі перадаюць у шматлікія дамы-інтэрнаты Беларусі.

“ЗБС “Бацькаўшчына” таксама выказала жаданне зрабіць свой унёсак у правядзенне акцыі: каля 60 кніжак гістарычнага і мастацкага характару сёння былі перададзены дзецям Салігорскага дома-інтэрната.

“Кажуць, што мова народа жыве толькі тады, калі на ёй размаўляюць дзеці. Праз распаўсюд беларускамоўных твораў мы імкнемся данесці да маладых беларусаў важнасць шанавання культурнай спадчыны сваёй радзімы, бо пачуццё ўласнай годнасці і адказнасці за лёс краіны з’яўляюцца неад’емнай часткай самарэалізацыі кожнага чалавека. Дзеці не павінны быць ахвярай той сітуацыі, што склалася сёння вакол беларускай мовы. І мы павінны зрабіць усё ад нас залежнае, каб яны не сталі манкуртамі на ўласнай зямлі”, – так пракаментавала акцыю намесніца старшыні грамадскага аб’яднання “ЗБС “Бацькаўшчына” Ніна Шыдлоўская.