19 студзеня 2023 года мінскай спявачцы Мэрыем Герасіменка, якую затрымалі пасля выканання песні гурта «Океан Ельзи», прысудзілі 3 гады «хатняй хіміі» па «народным артыкуле» (актыўны ўдзел у дзеяннях, якія груба парушаюць грамадскі парадак). Учора ў Мэрыем быў дзень нараджэння — citydog.io прапануе ўзгадаць яе гісторыю.

Хто такая Мэрыем

Мінчанка Мэрыем Герасіменка пачала спяваць з 5 гадоў, скончыла музычную школу па класе харавых спеваў, але звязваць з гэтым сваю прафесію не планавала. Скончыла юрыдычны каледж, а пасля — юрфак адной з беларускіх ВНУ.

Марай юнай Мэрыем было стаць следчым у пракуратуры, а пасля — адвакаткай, але, як яна прызнавалася ў адным з інтэрв’ю, «абараняць вінаватых або паступаць не па сумленні — гэта не тое, чым бы я хацела займацца ў будучыні». Зрэшты, старэйшыя калегі безапеляцыйна сцвярджалі, што з такой знешнасцю ў юрыспрудэнцыі ёй рабіць няма чаго.

Спяваць у клубах дзяўчына пачала ў 15-16 гадоў, каб падтрымаць сям’ю ў перыяд фінансавых цяжкасцяў.

Як пра прафесійную спявачку пра Герасіменка загаварылі ў 2013 годзе, калі яна пачала актыўна ўдзельнічаць у музычных тэлевізійных конкурсах спачатку ў Беларусі, а пасля ў Расіі і Украіне.

Мінчанка ўдзельнічала ў расійскіх шоу «Галоўная сцэна» і «Голас»: у першым ёй адмовілі ўсе суддзі, у другім на выкананне дзяўчыны ніхто не павярнуўся. Затое яна паспяхова выступіла на шоу «Песні на ТНТ». Акрамя таго, атрымала намінацыю на прэмію «Адкрыццё года», выступала на конкурсе «Новая хваля 2013» і «Акадэмія талентаў».

У 2018 годзе Мэрыем удзельнічала ў 8-м сезоне ўкраінскага шоу «Голас краіны». Падчас сляпога праслухоўвання да яе павярнуліся трое з чатырох суддзяў: Сяргей Бабкін, Патап і Джамала. Яна праспявала Human Rag’n’Bone Man. Выступленне прысвяціла бацьку: «У мае 16 гадоў яго не стала, і толькі цяпер я зразумела, як мала часу надавала дарагому чалавеку», — распавяла тады Мерыем.

У якасці настаўніка дзяўчына абрала Джамалу і дайшла да 8-га выпуску, дзе на этапе баёў пакінула шоу.

На пытанне, адкуль такое незвычайнае імя і эфектная знешнасць, Мэрыем адказала: «У мяне мама — беларуска, а тата — араб. Можа, таму я такая сімпатычная» (смяецца).

Мэрыем піша песні, у яе ёсць свая школа Music Space у Мінску, ёсць свой гурт Meriem Band.

У сакавіку 2022 года Мэрыем размясціла допіс ў Instagram з фрагментам песні «1994» сваёй украінскай настаўніцы з наступным тэкстам: «Гэтаму відэа ўжо 4 гады, але сэнс і сіла песні зараз у самае сэрца... Pray for UKRAINE».

Знаёмыя спявачкі (яны ў Беларусі, таму пажадалі застацца ананімнымі) расказваюць: «Мэрыем неверагодна моцная і смелая, сапраўдны баец, які ніколі не баіцца выказаць сваё меркаванне. Усё, да чаго «заклікала» Мэрыем, — гэта да міру без вайны. Яна да апошняга заставалася ў Беларусі».

Як і за што яна патрапіла ў турму

Мэрыем затрымалі 4 жніўня 2022 года пасля канцэрта ў мінскім бары «Банкі-бутэлькі», дзе спявачка выконвала песню «Обійми» гурта «Океан Ельзи». Факт выканання песні па-ўкраінску абурыў беларускіх прапагандыстаў, на падтрымку якім кінуліся сілавікі.

Пасля затрымання спявачку двойчы асудзілі на 15 сутак па адміністрацыйным артыкуле, а потым затрымалі ў межах крымінальнай справы па ч. 1 арт. 342 КК РБ (актыўны ўдзел у дзеяннях, якія груба парушаюць грамадскі парадак).

У «пакаяльным» відэа дзяўчына казала, што не ведала, што заробленыя ёю грошы будуць накіраваныя на набыццё беспілотнікаў для Украіны (раней блізкі да сілавікоў тэлеграм-канал пісаў, што дзяўчына перавяла грошы на куплю «Байрактара» для Узброеных сіл Украіны).

У чацвер, 19 студзеня 2023 года, пасля амаль 6 месяцаў зняволення на Валадарцы, Мэрыем вынеслі прысуд: 3 гады «хатняй хіміі». Дзяўчыну асудзілі па «народным артыкуле» — ч. 1 арт. 342 КК РБ (актыўны ўдзел у дзеяннях, якія груба парушаюць грамадскі парадак).

У панядзелак, 23 студзеня, Мэрыем Герасіменка спаўнілася 29 гадоў.

Калегі пра Мэрыем: «Сілаў табе, далікатная, моцная жанчына! Ты не адна»

Руся, Shuma: «Я знаёмая з Мэрыем па яе студыі, дзе мы запісвалі частку працы. Мы з ёй не шмат стасаваліся, але я бачыла Мэрыем падчас працы з вучнямі яе школы, як яна сваёй любоўю і верай запальвае ў іх таленты. У яе студыі заўсёды выдатная атмасфера!

Мэрыем вельмі добрая, светлая, спагадлівая дзяўчына і артыстка. Мне дазваляла працаваць са зніжкай, як спявачка спявачцы. Мы часам размаўлялі пра музыку, і я дакладна ведаю, што Мэрыем аддана служыць музе і людзям.

Мне было вельмі балюча назіраць яе арышт, я з усёй моцы жадаю асабіста Мэрыем і яе сям’і хутчэй перажыць гэты кашмар і не зламацца. Я глыбока перажываю, як і ўсе мы, расцягнуты на дзесяцігоддзі генацыд нашай культуры. Рэжым баіцца мастацтва, бо мастацтва не прадаецца. Людзі мастацтва заўсёды гавораць аб праўдзе, якая нязручная. Мэрыем патрапіла ў гэтыя жорны рэжыму па той жа прычыне. Сілаў табе, далікатная, моцная жанчына! Ты не адна».

Гурт Naviband: «Людзі працягваюць з’яжджаць, людзей працягваюць затрымліваць і ладзіць паказальныя суды. У турме — людзі культуры: «Ірдарат», «Тор-бэнд», «Лайтсаўнд», Мэрыем — гэта абсалютна ненармальна і дзіка».