4 лютага ў Нацыянальнай бібліятэцы прайшоў круглы стол да 140-годдзя Я. Коласа і 100-годдзя Нацыянальнай бібліятэкі Беларусі.
Дом-музей Я. Коласа з’яўляецца цэнтрам культурнага жыцця, захоўвае дух свайго часу і падтрымлівае атмасферу гасціннасці і сардэчнасці. Пра гэта распавяла яго дырэктар Ірына Уладзіміраўна Мацяс. У 2022 годзе музей прапануе сваім наведвальнікам лекцыі пра жыццёвы і творчы шлях Я. Коласа, інтэрактыўныя праекты: квэст-гульню па экспазіцыі музея «Таямніцы дома Песняра», інтэрактыўную гульню " Жыццё па Коласу«, цыкл творчых мерапрыемстваў: літаратурны чацвер, сустрэчы з творчай інтэлегенцыяй у Доме-музеі Я. Коласа, спец-праекты музея: «У дзень вяселля — у музей», «Выпускны ў Доме Коласа», літаратурна-музычныя вечары «Кватэрнік у дзядзькі Якуба» — сустрэчы з паэтамі, музыкантамі.
Падарожжны па мясцінах Коласа
Будзе прапанавана здзейсніць экскурсіі па мясцінах, звязаных з дзейнасцю Якуба Коласа: Акінчыцы, дзе нарадзіўся Я. Колас, а таксама — Смольню, Ласток Філіял «Мікалаеўшчына» прапануе наведанне мемарыяльных і літаратурных экспазіцый, экскурсійны маршрут «Акінчыцы — Альбуць — Смольня», паход выхаднога дня «Свет раслін на службе сям’і», збор лекавых раслін, кансультацыі траўніка.
Шэраг разнастайных мерапрыемстваў у гэтым годзе
Нацыянальная бібліятэка і Дзяржаўны літаратурна-мемарыяльны музей Я. Коласа падпісалі пагадненне аб супрацоўніцтве ў межах святкавання юбілея 140-годзя з дня нараджэння народнага песняра. «Цягам года адбудуцца супольныя мерапрыемствы разам з літаратурным музеем, пройдуць канферэнцыі, круглыя сталы, лекцыі коласазнаўцаў для шырокай публікі, — паведаміў намеснік генеральнага дырэктара Нацыянальнай бібліятэкі Алесь Суша. — Змогуць адбыцца шматлікія выставачныя мерапрыемствы з прадстаўленнем яго выданняў, дэманстраваннем рукапісаў народнага песняра, музычных дакументаў, нотных запісаў народнага паэта. Будуць запланаваныя музейна-педагагічныя заняткі адукацыйна выхаваўчага характару.
Нацыянальная бібліятэка — коласаўская скарбніца
Нацыянальная бібліятэка валодае вялікі рэсурсамі, звязанымі з творчасцю Я. Коласа. У галоўнай сховішчах галоўнай скарбніцы краіны захоўваецца першая кніга Я. Коласа „Другое чытанне для дзяцей беларусаў“, тут зберагаюцца каля 100 выданняў Я. Коласа, 70 аўдыё-візуальных дакументаў, каля 200 нотных запісаў музычных твораў, вялікая колькасць мастацкіх твораў (вядомых мастакоў-графікаў В. Шаранговіча і Г. Паплаўскага, і іншых), 42 аўтарэферата кандыдацкіх дысертацый айчынных навукоўцаў на тэмы творчасці Я. Коласа.
Асаблівая ўвага будзе нададзена педагагічнаму аспекту спадчыны Я. Коласа, бо ён пачынаў сваю працу як педагог, потым перайшоў да літаратурнай і навуковай дзейнасці» — адначыў А. А. Суша.
Эла Дзвінская
