Лета — той час, калі вельмі даступная свежая гародніна, таму мы падрыхтавалі для вас рэцэпты трох хуткіх і карысных салатаў, што елі яшчэ нашыя продкі. У летнюю спёку, калі не хочаца цяжкай ежы, такія вітамінныя салаты як раз тое, што трэба, можна падаваць іх з мяснымі стравамі альбо есці як цалкам самастойную страву.
Салат са свежых агуркоў «Мізэрыя»
Цяжка сказаць, чаму смачны, асвяжальны салат са свежых агуркоў называецца «Мізэрыя», што па латыні значыць бедны, але любілі яго есці і заможныя людзі. Такі салат падавалі са смажанам індыкам яшчэ з часоў Казіміра Ягелончыка.
Гатуецца ён вельмі проста. Ачышчаныя маладыя агуркі нарэзаць, пасыпаць 1 чайнай лыжкай солі, дадаць крыху цукру, вымешаць, пакуль не пойдзе сок з агуркоў. Пасячы пук кропу, пасыпаць ім агуркі, заправіць смятанай і папярчыць перад падачай.
Нам спатрэбіцца на порцыю:
Агуркі — 200 грамаў
Пук кропу
Дзве сталовыя лыжкі смятаны
Соль, перац і цукар — па смаку
Салат «Сыры» капусны
Гэты салат, як і «Мізэрыю», гатавалі здаўна і маглі падаваць да мясных страваў, але ён смачны і як самастойная страва. Капусту тонка насячы і парэзаць упоперак. Чырвоную цыбулю парэзаць паўкольцамі, а моркву проста натаркаваць. Дадаць па смаку соль і перац, смятану і лыжку гарчыцы гарошкам, добра вымешаць і даць яму крыху насыціцца, перад падачай можна ўпрыгожыць салат зялёнай цыбуляй.
Нам спатрэбіцца на порцыю:
Капуста — 200 грамаў
Цыбуля — 50 грамаў
Морква — 50 грамаў
Лыжка гарчыцы гарошкам
Дзве сталовыя лыжкі смятаны
Соль і перац — па смаку
Салат «Зялёны»
Гэты салат з’явіўся яшчэ за часамі каралеўскага роду Вазаў, прыкладна ў XVI стагоддзі і быў папулярны сярод знаці. Лісткі зялёнай салаты добра вымыць, выкласці на талерку ці ў салатніцу і заправіць соўсам. Соўс гатуецца з нятлустай смятаны, натаркаванага часнаку, солі і перцу. Перад запраўкай салата соусу лепш даць насыціцца смакамі з гадзіну. Салату паліць соусам, дадаць варанае яйка, парэзанае папалам і крыху гарчыцы гарошкам. Смачнае есці!
