Анлайн-лекцыя Андрэя Хадановіча пра Антоні Сланімскага

У сераду, 5 сакавіка, Андрэй Хадановіч чытае анлайн-лекцыю «Акно без крат. Антоні Сланімскі і яго творчасць» у межах цыклу «Санаторый пад клепсідрай».

Антоні Сланімскі (1895-1976) быў празаікам, драматургам, калумністам, мемуарыстам, але найперш — віртуозным паэтам. Сланімскі за сваё доўгае творчае жыццё паспеў пабываць і скандальнай зоркай паэтычнай эстрады, кабарэ і газетнай хронікі; і адным з наймаладзейшых «жывых класікаў», адным з лідэраў найпапулярнейшай паэтычнай групы «Скамандр»; і абаронцам ліберальных каштоўнасцяў у няпросты час нараджэння фашызму; і выгнаннікам у ваенныя і пасляваенныя гады; і аўтарам, які наважыўся вярнуцца з эміграцыі ў сацыялістычную Польшчу, часам мусіў лавіраваць, але паслядоўна бараніў свабоду творчасці ў несвабоднай краіне, за што стаў маральным аўтарытэтам для маладзейшых інтэлектуалаў.

Вось некалькі тэзаў, якія падрабязней разгорне лектар, праілюстраваўшы іх арыганаламі, а таксама старымі і новымі (уласнымі) беларускімі перакладамі польскага класіка:
 

• Антоні Сламінмскі — ліберал, рацыяналіст, скептык
•  Малады творца і паэтычная група «Скамандр»
•  Кавярня як лад жыцця пісьменніка
•  «Дзве айчыны»: крытыка антысемітызму, фашызму і ксенафобіі
•  Ці лёгка быць пацыфістам у цёмныя часы?
•  Паэт у эміграцыі. Тэма вайны і выгнання ў творчасці пісьменніка
•   «Я выхіляўся ўсё жыццё і буду выхіляцца. Але за борт не выскачу»: паэт у сацыялістычнай Польшчы. Цкаванне творцы сістэмай
•  Праблема канфармізму, цэнзуры і самацэнзуры
•  Паэзія Сланімскага ў беларускіх перакладах: ад Максіма Танка да Андрэя Хадановіча