Анлайн-прэзентацыя агляду «Нас вырашылі зусім звесці са свету»

У суботу, 8 сакавіка, праваабаронцы «Вясны» ладзяць анлайн-прэзентацыю агляду «Нас вырашылі зусім звесці са свету», прысвечанага парушэнням правоў жанчын у месцах несвабоды Беларусі.

У дакуменце сабраныя сведчанні жанчын, якія сутыкнуліся з катаваннямі, прыніжэннямі і гендарнай дыскрымінацыяй падчас затрымання, адміністрацыйнага арышту, утрымання ў следчых ізалятарах і калоніях.

«Мы імкнуліся не проста пералічыць шматлікія факты прыніжэнняў па гендэрнай прыкмеце, якія — скажам прама — наўмысна выкарыстоўвае беларускі рэжым супраць жанчынаў у няволі, але і даць слова самім пацярпелым.

Чытаць гэта агляд будзе нялёгка, бо гэта такі канцэнтраваны боль і пакуты, праз якія кожны дзень праходзяць палітзняволеныя. Але і маўчаць пра гэта нельга, бо наша мэта — данесці да шырокай аўдыторыі сведчанні пра тыя сістэматычныя здзекі, безчалавечае абыходжанне і гвалт, якім падвяргаліся і падвяргаюцца жанчыны ў месцах зняволення ў Беларусі», — адзначаюць праваабаронцы.

Падчас сустрэчы ўдзельнікі і ўдзельніцы азнаёмяцца з асноўнымі высновамі агляду, абмяркуюць актуальную сітуацыю са становішчам жанчын у месцах зняволення і разгледзяць магчымыя спосабы іх падтрымкі.


Удзел вольны. Рэгіструйцеся па спасылцы.