Дадатковы сеанс мультфільма «Таямніца Келза» на беларускай мове
26.03.2017
17:30 - 17:30
Кінатэатр «Масква» (пр. Пераможцаў, 13)
квіткі ў касах кінатэатра
На мінулых выхадных у кінатэатры «Масква» адбылася прэм’ера мультфільма «Таямніца Келза», перакладзенага на беларускую мову пры падтрымцы «Атлант Тэлеком» і velcom. Мультфільм тройчы сабраў аншлаг: у агульнай колькасці прагляды наведалі каля 2 тысяч мінчан.
З улікам шматлікіх запытаў гледачоў партнёры праекта вырашылі яшчэ раз паказаць мультфільм на вялікім экране.У тых, хто не паспеў купіць квіткі на першыя паказы, з’явіўся шанс паглядзець яго ў бліжэйшую нядзелю — 26 сакавіка, у 17:50 у кінатэатры «Масква».
Паказы сусветнага кіно на беларускай мове праходзяць у рамках праекта «Беларускія ўікенды». Фільмы агучваюцца на беларускую мову з удзелам вядомых беларускіх акцёраў: Паўла Харланчука, Ганны Гітрык, Святланы Цімохінай, Алеся Маўчанава і іншых.
Ва ўсім свеце «Таямніцу Келза» паглядзелі мільёны гледачоў, крытыкі адзначылі яго цэлым арсеналам ганаровых узнагарод, у тым ліку намінацыяй за «лепшы анімацыйны фільм» прэміі «Оскар». У беларускай агучцы гэты мультфільм перамог у яшчэ адной адмысловай намінацыі ад гледачоў – «За таленавіты ўнёсак у прасоўванні роднай мовы». Менавіта так яны і пісалі ў сваіх каментарах на форумах пасля паказу з просьбамі паўтарыць мультфільм.
Дадатковы сеанс мультфільма «Таямніца Келза» на беларускай мове адбудзецца 26 сакавіка ў кінатэатры «Масква» па адрасе: праспект Пераможцаў, 13. Падрабязнасці на сайце kinakong.by, квіткі ў касах кінатэатра і на bycard.by.
