У чацвер, 13 чэрвеня, у Лодзі адкрываецца фотавыстава «Пробліскі часу — беларускія фотакнігі і зіны». Гэта частка традыцыйнага Fotofestiwal Lodz.
Дата: 13 чэрвеня
Час: 19.00
Месца: Art_Inkubator, Tymienieckiego 3, Лодзь
На выставе можна пабачыць беларускія фотакнігі і часопісы, выдадзеныя ў апошнія гады ў розных краінах Еўропы. Усіх іх аўтараў яднае цікавасць да калектыўнай і індывідуальнай памяці.
У архіве VEHA сабраны сямейныя фотаздымкі, зробленыя ў Беларусі да 1970 г.
Фотаальбом Аляксея Казанцава «Relaxing Chamber» разглядае архетыпічны сімвалізм жывёл у калектыўнай несвядомай памяці чалавецтва.
У «Чаромушскай адысеі» Андрэй Логінаў распавядае прыгодніцкую гісторыю знаходкі шкляных негатываў, на якіх невядомы фатограф у вёсцы Заходняй Беларусі зафіксаваў людзей у сапраўды трагічныя перыяды гісторыі.
Зін Андрэя Анро «Таварыства шчаслівай смерці» — гэта гісторыя бабулі аўтара Галены. Яна далучылася да Апостальства Добрай Смерці і вырашыла да канца жыцця заставацца ў ложку, не ўстаючы, і чакаць хэпі-энду.
Фатаграфіі Сяргея Брушко з ягонага альбому «Zмена» сталі сімвалам эпохі пераменаў у Беларусі 1980–1990 гадоў.
Яўген Атцецкі ў сваёй «Плошчы пераменаў» разглядае асобу ў кантэксце палітычных зменаў, дзе адлюстроўвае дваровы супраціў рэжыму.
У зіне «Betonium» Кацярына Кузьмічова даследуе сучасную ідэнтычнасць былых краін Усходняга блока і іх архітэктурную спадчыну — жылыя дамы з жалезабетонных панэляў.
Куратарка — Вольга Мжэльская.
Выстава працуе па 23 чэрвеня.
Квіткі: 30 злотых звычайны, 10 — ільготны, абанемент на розныя падзеі фэста — 50 злотых. Дзецям да 12 гадоў уваход вольны.
