ХХХІ літаратурна-музычнае свята “Каласавіны”

3 лістапада 2016 года адбудзецца ХХХ міжнародная навуковая канферэнцыя “Каласавіны”, прысвечаная 110-годдзю творчай дзейнасці Якуба Коласа. З 1985 года кожную восень у дзень нараджэння Якуба Коласа Дом-музей народнага паэта збірае лепшыя сілы навуковага коласазнаўства з усёй рэспублікі і краін блізкага замежжа з мэтай даследавання і ўсебаковай прапаганды творчасці Песняра. Традыцыйна ў ёй прымуць удзел навукоўцы з розных рэгіёнаў Беларусі, супрацоўнікі ДНУ “Цэнтр даследаванняў беларускай культуры, мовы і літаратуры”, сталічных і абласных ВНУ, музеяў, а таксама госці з Польшчы, Літвы, Расіі і Украіны.

Спецыяльна да юбілею канферэнцыі падрыхтавана выстаўка з музейных фондаў, на якой прадстаўлены падарункі музею за апошнія 5 гадоў ад мастакоў, калекцыянераў, літаратараў і проста неабыякавых людзей – мастацкія работы, кнігі з дарчымі надпісамі, рукапісы і іншыя матэрыялы, якія значна папоўнілі музейныя калекцыі.

У 13.30 кожны жадаючы зможа ўскласці кветкі да помніка Якубу Коласу на плошчы яго імя.

Пасля заканчэння работы канферэнцыі сапраўдным падарункам для удзельнікаў і гасцей канферэнцыі стане канцэртная праграма з удзелам салістаў Нацыяльнага акадэмічнага вялікага  тэатра оперы і балета Рэспублікі Беларусь і акцёра і рэжысёра Нацыянальнай дзяржаўнай тэлерадыёкампаніі Рэспублікі Беларусь Алега Вінярскага, у выкананні якога прагучаць знакамітыя творы Якуба Коласа.

4 лістапада 2016 года Дзяржаўны літаратурна-мемарыяльны музей Якуба Коласа запрашае на Радзіму Песняра. Удзельнікі літаратурна-музычнага свята наведаюць выстаўку да 110-годдзя творчай дзейнасці народнага паэта і юбілею знакамітых твораў Якуба Коласа, якая размясцілася ў Стаўбцоўскай дзіцячай бібліятэцы імя Якуба Коласа. Новы статус і імя знакамітага земляка бібліятэка атрымала ў гэтым годзе да 65-годдзя з дня свайго заснавання.

На мемарыяльнай сядзібе “Альбуць “ адбудзецца ўрачыстае адкрыццё новай экспазіцыі з інтэрактыўнымі зонамі “Прырода ў творчасці Якуба Коласа”, дзе наведвальнікі змогуць спазнаць і адчуць таямніцы прыроды, зазірнуць у мікрасвет насякомых і навучыцца вызначаць час па сонечнаму гадзінніку.

У святочнай праграме: наведванне мемарыяльных сядзібаў, канцэрт з удзелам творчых калектываў Стаўбцоўскага раёна, ускладанне кветак да помніка Якубу Коласу ў вёсцы Мікалаеўшчына,  пасадка дрэў ў гонар славутых дзячоў Бацькаўшчыны ў скверы “Дрэва жыцця” на сядзібе “Смольня”.