Лекцыя «Еўрапейскі музей сучаснага мастацтва: вобраз, дзеянне, грамадства»

Праект «Еўрапейскае кафэ – адкрытая прастора Еўропы» 

5 лістапада (серада)

18:30

ЦЭХ
(пр. Незалежнасці, 58, к. 6)

Запрашаем на публічную лекцыю
Андэрса Крэйгера

«Еўрапейскі музей сучаснага мастацтва: вобраз, дзеянне, грамадства»

Музей сучаснага мастацтва Антвэрпэна (MuHKA) – добры прыклад музеяў такога кшталту. Ён быў заснаваны ў 1987 г. як працяг працы Міжнароднага культурнага цэнтра Антвэрпэна, ICC (1970-1982), створанага фламандскім урадам. Гэты цэнтр быў адным з заснавальнікаў Еўрапейскай канфедэрацыі музеяў «L’Internationale» і шырока вядомы сваімі амбіцыйнымі выставамі і калекцыяй твораў мастацтва, якія адносяцца да перыяду з сярэдзіны 1960-х.

Калекцыя MuHKA складаецца з 5 тысяч работ, створаных у розных тэхніках, але музей таксама мае доступ да больш чым 50 тысяч работ іншых чальцоў канфедэрацыі «L’Internationale»: MACBA ў Барселоне, Moderna Galerija ў Любляне, Reina Sofia ў Мадрыдзе, SALT у Стамбуле і Анкары, Van Abbemusem у Эйндховэне. Хоць у фокусе калекцыі MuHKA – фламандскія мастакі, яна з самага пачатку звярталася да міжнароднага досведу.

У 1977 годзе, калі святкавалася 400-годдзе з дня нараджэння Рубенса, ICC запрасіў маладога амерыканскага мастака Гордана Мата-Кларка (Gordon Matta-Clark) для стварэння архітэктурнай інтэрвенцыі ў закінутым офісным будынку. У калекцыі MuHKA цяпер толькі невялікі фрагмент таго «Барочнага офіса» (Office Baroque). Гэта праца павінна была стаць асновай музея сучаснага мастацтва і пастаяннай інсталяцыяй, пасля таго як Гордан Мата-Кларк памёр у 1978 г. Аднак уласнікі будынка аддалі яго пад знос. Інтэрвенцыя Мата-Кларка ў гарадскі ландшафт спалучала элементы актывізму і выяўленчасці, абстракцыю і маніпуляцыі з прасторай. Яна грунтавалася на трох прынцыпах, на якіх будуецца цяпер уся калекцыя MuHKA, – вобраз, дзеянне і грамадства.

У MuHKA надаюць увагу мастацтву краін былога СССР. Адной з апошніх  была выстава «Трымацца вачыма» масквічкі Вольгі Чарнышовай. У калекцыі ёсць працы такіх яркіх рускамоўных мастакоў, як Вячаслаў Ахунаў, Сяргей Браткоў, Ілля і Эмілія Кабаковы, Рустам Халфін, Уладзімір Мамышаў-Манро, Альмагуль Мельнібаева, Андрэй Манастырскі і Анатоль Асмалоўскі.

Лекцыя пабудаваная вакол прэзентацыі «The Collection as a Character» – вялікай выставы калекцыі MuHKA летам 2013 г.

Пра лектара:

Андэрс Крэйгер (нарадзіўся ў 1965 г. у Швецыі) – з 2010 г. куратар MuHKA ў Антвэрпэне, Бельгія, з 2012 г. – адзін з рэдактараў лонданскага мастацкага часопіса «Afterall». Быў дырэктарам мастацкай акадэміі Мальмё, куратарам «Lunds konsthall» на поўдні Швецыі, чальцом каманды праграмы «European Kunsthalle» ў Кёльне.

Арганізоўваў выставы па ўсёй Еўропе як незалежны куратар, апублікаваў мноства артыкулаў у мастацкіх часопісах і каталогах, выпусціў некалькі кніг у якасці рэдактара. У 1990-я быў ​​дырэктарам скандынаўскага інстытута сучаснага мастацтва ў Хельсінкі (NIFCA) і дырэктарам – заснавальнікам інфармацыйнага офіса Рады міністраў паўночных краін у Вільні.

Мова лекцыі: руская

Уваход вольны!

Як трапіць у ЦЭХ: