Крэсла – гэта тое, што нам трэба, калі больш нічога не трэба, гэта наглядны сімвал цывілізацыі. Бо менавіта для цывілізацыі, а не для выжывання, і патрэбны дызайн.
Ральф Каплан
Ці зможам мы ў сучасным свеце абысціся без крэсла? Мы адпачываем і працуем седзячы на крэсле, збольшага ў прасторы мы перасоўваемся таксама седзячы – у самалёце, цягніку, аўтамабіле. Мы вызначаем свой сацыяльны статус дзякуючы таму “крэслу”, якое займаем. Мы ямо, думаем, камунікуем, слухаем, глядзім і нават спортам займаемся седзячы. І гэта – наша “плата за прамахаждэнне”.
Крэсла падобнае да чалавека. Акрамя ног і спіны яно мае свой твар. А які твар у беларускага крэсла? Прыходзьце на “Пастулат”, дзе феерыя форм, фарбаў, матэрыялаў, вобразаў і тэхналогій знішчыць вашае ўяўленне пра крэсла толькі як пра сродак для сядзення. Правакатыўнасць і відовішчнасць праекта, выяўленая праз сінтэз відаў і накірункаў мастацтва ад дызайна як такога да рэдзі-мэйда, інсталяцыі, жывапісу, графікі, мультымедыя, перформанса, не пакіне вас абыякавымі. Ды і само месца выставы – раскошны камерцыйны цэнтр – адназначна падкажа, што мастацтва таксама з’яўляецца таварам, дзе мастакі пазначаць кошт сваіх твораў.
IV біенале “Пастулат 2018” будзе праходзіць з 18 па 28 лістапада ў папулярным у мінчукоў і гасцей сталіцы гандлёва-забаўляльным цэнтры Galleria Minsk (пр. Пераможцаў, 9). Адкрыццё выставы адбудзецца 17 лістапада ў 18.00
Карыстаючыся магчымасцю, мы хочам паказаць сукупную каштоўнасць сабранай калекцыі як асновы будучага Музея беларускага крэсла. “Пастулат” будзе прадстаўляць як новыя аб’екты, так і рэтраспектыву трох папярэдніх выстаў. Некаторыя з прадметаў “Пастулата” сталі набыткам сучасных калекцый, выстаўляліся ў Нацыянальным мастацкім музеі, былі ўзнагароджаныя Нацыянальнай прэміяй у вобласці выяўленчага мастацтва, прымалі ўдзел у міжнародных выставах у Вільнюсе, Варшаве, Таліне. І гэта заканамерна, бо праект прадстаўляюць вядомыя беларускія архітэктары, дызайнеры, мастакі, скульптары, фатографы і іншыя дзеячы сучаснага беларускага мастацтва.
Праект напоўніцца майстар-класамі, выступамі, лекцыямі і іншымі мерапрыемствамі:
На адкрыцці мы пабачым танцавальны перформанс тэатра “Альтана”.
Дыплом “крэсла-камунікатыЎ” аднаму з маладых удзельнікаў уручыць кафедра дызайна сацыякультурных камунікацый БДУ.
Галерэя “АртБлик” прадставіць праект мастакоў-манументалістаў “12 крэслаў”.
Мастацтвазнаўца, арт-крытык, гісторык мастацтва, куратар галерэі Tut.by Таццяна Бембель выступіць у якасці мадэратара працоўнай сустрэчы экспертаў “Беларускі дызайн: попыт і прапанова на рынку”.
Мы думаем, вас зацікавяць лекцыі па тэорыі і практыцы дызайна:
“Захапленне праектаваннем дома “Tomago” (Новая архітэктура)” вядомага архітэктара і дызайнера Льва Агібалава.
“Пакуты дызайна ў кропцы незвароту” кандыдата філасофскіх навук, дацэнта А.В. Чарнышова.
“Як патрапіць на старонкі часопіса. З асабістага досведу Аляксандра Кратовіча” архітэктара, заснавальніка студыі архітэктуры і дызайна Аляксандра Кратовіча.
“Фахверк і каркас. Досвед “будаўнічага дызайна”. Аляксандр Трусаў, архітэктар, дызайнер інтэр’ераў, сузаснавальнік дызайн-студыі “Четвертый квартал”.
“Дызайн у мастацтве і мастацтва ў дызайне” загадчыка кафедры прамысловага дызайна БДАМ Алеся Фаменкі.
“Сувязь гукавых практык у сучасным кіно і сучасным мастацтве” Яўгена Рагозіна.
А 24 і 25 лістапада прыходзьце на маркет дызайнерскай мэблі і прадметаў інтер’ера.
Дарэчы, экспанаты, якія вы ўпадабаеце, можна будзе набыць у галерэі “АртБлик” пасля завершэння выставы.
З 2012 года кожнае біенале станавілася падзеяй. Не сумняемся, што і чацвёрты “Пастулат” будзе значным для прафесійнай супольнасці і культуры ў цэлым, цікавым для патрабавальнага гледача.
Ды й увогуле, Пастулат – сябра чалавека!
Праект ажыццёўлены пры партнёрскай падтрымцы:
ТРЦ Galleria Minsk / МЕХО / AUPI / ГлассПойнт/ PREMIUM Decor/
Стиль-Декор/ ТЦ СитиГрад / UNIEL / Голдоптима/ Эггер / Сутория/
Сарафан Маркет / МИР ФОТО / Колорадо / Артблик / Openini / BY Furniture
Адрас: г. Мінск, пр. Пераможцаў, 9, 3 паверх
Час працы: 10.00 – 22.00,
УВАХОД ВОЛЬНЫ
Postoolat.unid.by +375293808075 +37544 7361226
