Выстава “Па-за канонам” у Гродне

У музеі гісторыі рэлігіі пачала працу выстава “Па-за канонам”, якая адлюстроўвае свет народнага сакральнага мастацтва XVIII–XX стст.

Яна знаёміць з творамі, створанымі па-за строгімі царкоўнымі канонамі – наіўнымі і кранальнымі вобразамі.

Народныя іканапісцы і скульптары натхняліся прафесійнымі кананічнымі ўзорамі і творамі заходнееўрапейскага жывапісу і графікі. Аднак, не маючы акадэмічнай мастацкай адукацыі, яны не маглі ўзнавіць арыгіналы ва ўсіх дэталях і вытанчанасці.

Таму малюнак на абразах максімальна спрошчаны і лаканічны: у прамалёўцы постацей і лікаў няма лішніх дэталяў, дамінуе графічнасць пры слабой прапрацоўцы аб’ёму, прапорцыі часта парушаюцца.

Лікі святых маюць падабенства з канкрэтнымі людзьмі, якія валодаюць поўнай гамай эмоцый і пачуццяў.

Часовая экспазіцыя складаецца з двух тэматычных блокаў. Першы ўключае евангельскія сюжэты, другі – выявы святых.

Большасць прадстаўленых твораў паходзіць з Гродзенскай вобласці. Асобную групу складаюць абразы Гомельскай іканапіснай школы, якая дзейнічала ў канцы XIX – пачатку XX стст.

Куратар – Сяргей Казуля, старэйшы навуковы супрацоўнік аддзела экспазіцыйна-выставачнай і навукова-даследчай работы.

Квіткі – 5 рублёў.