Медыяпраект «pARTisan» запрашае на ўрачыстую імпрэзу, прысвечанаю выхаду новых альбомаў «Калекцыі пАРТызана» — «Мінск. Нонканфармізм 1980-х» і «Віталь Чарнабрысаў».
У праграме: выступы герояў кніжак — Адама Глобуса, Лены Прэнц, Андрэя Плясанава, Вольгі Сазыкінай, Віталя Чарнабрысава і іншых, паказ відэахронік з архіва Юрыя Ігрушы, песні Андрэя Плясанава. А таксама адмыслова падрыхтаваны перформанс «Вясенні Спеў Звышчалавека» ў выканні Артура Клінава і Drum Ecstasy.
Мінскі мастацкі нонканфармізм 1980-х, альбо «неафіцыйнае мастацтва» ці «андэграўнд», — значная з’ява на тэрыторыі ўсіх постсавецкіх, постсацыялістычных краін, у межах якой праходзіла барацьба за права на свабоду, вольнае мысленне і мастацкае выказванне. Падзеі, што адбываліся тады, наўпрост ці ўскосна звязаныя не толькі з сучаснымі мастацкімі працэсамі ў Беларусі. У тым часе, шмат у чым рэвалюцыйным і вызначальным, можна і трэба шукаць адказы на многія пытанні, якія хвалююць тых, хто спрабуе сёння зразумець прастору, у якой жыве, і сваё месца ў ёй.
Акрамя таго, гэтай імпрэзай «pARTisan» распачынае святкаваць сваё 15-годдзе! Так, нам ужо 15 поўных насычаных год. Адзначаць адмыслова не будзем — працягваем карпатліва працаваць. Але цягам нашых імпрэз хацелі б нагадваць, што, набываючы нашыя альманахі і альбомы, прыходзячы на нашыя імпрэзы, вы і робіце магчымым нашае існаванне.
Падрабязней пра альбом http://partisanmag.by/?p=16164
Падзея на ФБ https://www.facebook.com/events/681602485333745/
Шчыра запрашаем!
