Прэзентацыя празаічнай кнігі Марыі Роўда
Пачатак: 03.02 (18:00)Канец: 03.02 (19:00)
Кнігарня «ЛогвінаЎ»
3 лютага (серада) у мінскай кнігарні «ЛогвінаЎ» (пр. Незалежнасці, 37а) адбудзецца прэзентацыя новай кнігі Марыі Роўда «Клінічны выпадак, альбо Дарэмныя ўцёкі». Пачатак у 18.00. Уваход вольны. Запрашаем!
У вечарыне, акрамя аўтаркі, возьмуць удзел: Старшыня ГА “СБП”, празаік, рэдактар кнігі Барыс Пятровіч, літаратары Ігар Бабкоў, Адам Глобус, Севярын Квяткоўскі, Андрэй Дынько ды іншыя (праграма ўдакладняецца).
Музыка — Уладзімір Дрындрожык.
Зборнік Марыі Роўда стаў 71-ым выпускам серыі “Кнігарня пісьменніка” Бібліятэкі Саюза беларускіх пісьменнікаў і складаецца з аповесцей і апавяданняў, напісаных на мяжы 20-га і 21-га стагоддзяў. Героі твораў — гэта моладзь дзевяностых, якая шукае сябе, сапраўднае каханне і свае карані на разломе часу, калі здаецца, што паўстае цалкам новая краіна. З самаіроніяй, сумам і любоўю аўтарка распавядае пра сваё пакаленне і пра будучыню, якую маладзёны чакалі, але не атрымалі, і якую асэнсоўвалі ўжо ў новую эпоху.
Марыя Роўда — лінгвіст, скончыла факультэт ангельскай мовы МДЛУ, працуе дацэнтам на кафедры гісторыі і граматыкі ангельскай мовы таго ж універсітэта. Перакладала на беларускую мову англамоўную прозу, драматургію і дзіцячыя мультфільмы. Публікуецца з 1993 года.
Сустрэча пройдзе ў межах грамадскай культурніцкай кампаніі “Будзьма беларусамі!”
Прэс-служба ГА “Саюз беларускіх пісьменнікаў”
