Прэзентацыю кнігі Насты Кудасавай “Маё невымаўля”
Пачатак: 31.05 (08:00)Канец: 31.05 (17:00)
Літаратурны музей Петруся Броўкі
7 чэрвеня 2016 года а 19-й гадзіне ў Літаратурным музеі Петруся Броўкі адбудзецца прэзентацыя новай кнігі Насты Кудасавай “Маё невымаўля” ў межах праекта “Сустрэча з аўтарам”.
*
там, дзе рэчы стануць рэкамі,
рэйкамі для ўцёку душаў,
я пайду з нутром парэпаным
марнадзёнства абцярушваць,
я пайду, пакіну многае,
дараванняў не чакаю,
бо была занадтаногаю
і ўпівалася шляхамі,
бо як здраднікаў адрынула
ўсе падручнікі й парэнчы,
я пайду – паўсюды вінная –
ў край без роспачаў і рэчаў…
(з кнігі “Маё невымаўля”)
“Маё невымаўля” – кніга, за якую я адчуваю вялікую адказнасць. Галоўны змест зборніка можна акрэсліць як перажыванні чалавека, закаханага ў жыццё і ў зямныя лёсы – лёс паэта, лёс жанчыны, лёс жука, сабакі, мядзведзя, сасны, ветра… Гэта кніга – услухоўванне ў пяянне рыб і ўзрастанне дрэваў. Гэта мой шлях углыб мовы, да першасных сутнасцяў словаў, і далей – да простага і няўлоўнага, да таго, што застаецца па-за мовай, між радкоў. У кнігу ўвайшлі выбраныя вершы, напісаныя ў апошнія пяць гадоў – вельмі нялёгкі ў маёй біяграфіі перыяд. Але нягледзячы на боль, адзіноту і расчараванне, я б хацела данесці чытачу веру ў галоўнае – веру ў любоў, што разлітая паўсюдна, і якая адзіная напаўняе наш свет сэнсам і прыгажосцю”, – кажа пісьменніца пра сваю новую кнігу.
На прэзентацыі возьмуць слова рэдактары кнігі “Маё невымаўля” – Андрэй Хадановіч, Алесь Пашкевіч і пісьменнікі Ігар Кулікоў, Анатоль Івашчанка, Андрэй Фаміцкі, Яўген Бяшчасны.
Наста Кудасава – паэтка, нарадзілася ў 1984 годзе ў Рагачове. Аўтар кніг паэзіі “Лісьце маіх рук” (2006), “Рыбы” (2013), “Маё невымаўля” і шэрагу публікацыяў у розных перыядычных выданнях. З’яўлялася ўдзельніцай альманахаў “Скрыпторый”, “Літаратурны квартал”, зборніка паэзіі “Яна і я”, праекта “Начная чытанка” (2007). Творы перакладаліся на рускую і балгарскую мовы. Сябра Саюза беларускіх пісьменнікаў.
Адрас: вул. Карла Маркса, 30, кв. №4;
Кантактны тэлефон: (017) 226-09-81; (017) 327-27-50.
