Першы беларускі зомбі-хорар прэзентуюць у Віцебску!
Пачатак: 13.03 (19:00)Канец: 13.03 (19:00)
арт-паб "Торвальд"
У панядзелак 13 сакавіка ў віцебскім пабе “Торвальд” адбудзецца творчая сустрэча з пісьменнікамі Уладзімірам Садоўскім і Андрэем Дзічэнкам. Абодва аўтары сёлета выйшлі ў фінал літаратурнай прэміі “Дэбют” і прэтэндуюць на атрыманне галоўнага прызу – 2000 даляраў.
Уладзімір Садоўскі
Уладзімір Садоўскі прадставіць свой нашумелы зомбі-хорар “1813”, Андрэй Дзічэнка – пікантную кнігу-падарожжа па памежных прасторах пад назвай “Сонечны чалавек”.
Аповесць “1813” ужо за першыя тыдні з моманту публікацыі атрымала дзясятак станоўчых водгукаў і наступныя чатыры месяцы трымалася ў лідарах па выніках продажаў электронных кніг. У пачатку 2017 года кніга выйшла ў папяровым варыянце – і таксама б’е рэкорды па распаўсюду.
Андрэй Дзічэнка
Зборнік апавяданняў “Сонечны чалавек” Андрэя Дзічэнкі – дэбютная кніга аўтара на беларускай мове, якая выйшла толькі ў электронным варыянце на Kniharnia.by. Да гэтага ён напісаў некалькі кніг па-руску, друкуецца ў прэстыжным расійскім “Снобе”, вывучаецца ў курсах новай літаратуры ў каледжах ЗША. Галоўныя героі яго твораў – анамальныя людзі, ахвяры лакальных канфліктаў, азлобленыя маньякі, палкія дзяўчыны, ідэйныя цнотнікі і сталкеры з нязведаных сусветаў.
Увага, Віцебск! Творчая сустрэча з пісьменнікамі, якія прымушаюць па-новаму глядзець на беларускую літаратуру, адбудзецца ў панядзелак 13 сакавіка ў пабе “Торвальд” (вул. Талстога, 1). Пачатак а 19.00. Уваход вольны.
Мерапрыемства арганізавана з ініцыятывы выдавецтва “Янушкевіч” і партала беларускіх электронных кніг Kniharnia.by.
