Спеўны сход адкрывае новы сезон “Жаніцьбай Цярэшкі”

«Спеўны сход» адкрые новы сезон спеўна-танцавальнай фольк-вечарынай па матывах старадаўняга абраду – «Жаніцьба Цярэшкі». Жаніцьба Цярэшкі праводзілася, каб пазнаёміць паміж сабой маладых людзей и пасадзейнічаць стварэнню пар. Абрад зарадзіўся ў часы Полацкага княства і дагэтуль актыўна праводзіцца на Лепельшчыне. Жаніцьба Цярэшкі праходзіць у форме гульні з ужываннем песень-цярэшак і парных танцаў – падэспань, кракавяк, полька і інш.

Спеўны сход правядзе арганізатар праекту  – Сяржук Доўгушаў. Ён падрыхтуе ўдзельнікаў сходу да выканання песень і пазнаёміць з асноўнымі этапамі абраду. Як танчылі раней падчас святкаванняў, пакажа Сяргей Выскварка, а музычнае суправаджэнне яму створаць любанскія музыкі – Мікола і Васіль.

Спеўны сход запрашае тых, хто ўжо знайшоў пару і хацеў бы адчуць сябе ў ролі жаніха ці нявесты. Каб паўдзельнічаць у самым абрадзе, прапаноўваем вывучыць песні-цярэшкі загадзя. Тэксты будуць даступныя ў сацыяльных сетках Спеўнага сходу.

Спеўны сход “Жаніцьба Цярэшкі” адбудзецца 18 студзеня на культурніцкай пляцоўцы Корпус (пр. Машэрава, 9, к 8)  Пачатак а 19.00. Уваход вольны.

Аб ініцыятыве Спеўны сход

Спеўны сход – гэта сустрэчы, дзе людзі збіраюцца разам, каб спяваць розныя беларускія песні. Сяржук Доўгушаў, кіраўнік праекту, ладзіць гэтыя сустрэчы, вучыць людзей спяваць ды спявае разам з імі. Некамерцыйная ініцыятыва «Спеўны сход» ужо чатыры гады яднае сотні людзей, якія маюць цікавасць да беларускай музычнай культуры.

Мерапрыемства ў сацсетках: Facebook і VK