У аўторак, 29 кастрычніка, беларусы Берліна ладзяць Ноч нерасстраляных паэтаў.
Дата: 29 кастрычніка
Час: 19.30 (час мясцовы)
Месца: Literarisches Colloquium Berlin e.V., Am Sandwerder 5, Берлін
Удзел бяруць Яраслава Ананька, Тамара Кабяк, Кацярына Яворская, Zmicer Che & Kusnetz, Tina Wünschmann і іншыя.
Куратаркі — Света Бень і Інга Лізенгевіч.
У ноч з 29 на 30 кастрычніка 1937 у Мінску НКУС забіла больш за 100 прадстаўнікоў беларускай інтэлігенцыі: навукоўцаў, пісьменнікаў, а таксама паэтаў. Іх літаратурная спадчына дзесяцігоддзямі замоўчвалася.
Сёлетняя «Ноч нерасстраляных паэтаў» прысвечана лёсам аўтарак — жанчын, імёны якіх сёння малавядомыя.
У 30-я гады яны таксама ўдзельнічалі ў такіх літаратурных гуртках, як «Маладняк» і «Узвышша», а неўзабаве пасля гэтага сталі ахвярамі рэпрэсіўнай эпохі. Часта невядомыя нават даты іх нараджэння і смерці, а захаваліся толькі некалькі іх тэкстаў.
Загінулі не ўсе — многія лёсы скончыліся ў лагерах, ссылках, уцёках, пазбаўленнях або ў адмове ад творчай дзейнасці.
Беларускія мастакі, перакладчыкі і дзеячы прэзентуюць тэксты пісьменнікаў, расстраляных у ноч з 29 на 30 кастрычніка 1937 года, а таксама творы сваіх паплечнікаў і сучасную паэзію.
Тэксты такіх аўтарак, як Ядвіга Бяганская, Валянціна Казлоўская, Канстанцыя Буйло, Ірына Каханоўская, Паўліна Мядзёлка, Яніна Германовіч, Ганна Брэская, Марта Актбер, Яўгенія Пфляўмбаўм, Наталля Вішнеўская, Ларыса Геніюш, Сэлія Дропкін і Ганна Марголіна ў арыгінале на беларускай мове ці на ідыш у перакладзе на нямецкую чытаюць і кладуць на музыку Света Бень і Жэня Окс.
Квіткі коштам 8 еўра поўны, 5 еўра льготны бярыце па спасылцы.
