Сустрэча з філосафам Уладзімірам Мацкевічам 19 лістапада ў Гродне

19 лістапада Лятучы ўніверсітэт, Міжнародны кансорцыум “ЕўраБеларусь” і этна-крама “Цудоўня” запрашаюць на сустрэчу з філосафам і метадолагам Уладзімірам Мацкевічам, падчас якой будуць прэзентаваныя выдавецкія праекты Году беларускага мыслення – Анталогія “Код прысутнасці” , зборнік “Цытуй сваё”, а таксама некаторыя ранейшыя выданні. Імпрэза адбудзецца ў межах адкдрыцця кніжнай лаўкі ў этна-краме “Цудоўня” (вул. В. Траецкая, 14), пачатак а 17.00.

Ад невялічкіх цытатаў беларускіх мысляроў, мастакоў, культурных і грамадскіх дзеячоў да грунтоўных тэкстаў самых розных жанраў і стыляў, што адлюстроўваюць інтэлектуальны пошук беларусаў за апошнія 15 год, – у суботу 19 лістапада разам з філосафам і метадолагам Уладзімірам Мацкевічам гарадзенцы будуць знаёміцца з аднымі з самых цікавых інтэлектуальных выдавецкіх праектаў 2016 году і разважаць пра сучаснае беларускае мысленне, яго стыль і адметнасць, герояў і знакавыя падзеі, асноўныя тэмы і праблемныя пытанні.  Разам з Анталогіяй беларускага мыслення “Код прысутнасці” і зборнікам “Цытуй сваё” на адкрыцці кніжнай лаўкі ў этна-краме “Цудоўня” будуць прадстаўленыя і ранейшыя кнігі – як ўласна аўтарскія выданні, так і плён супольнай даследчыцкай працы разам з калегамі з Агенцыі гуманітарных тэхналогій.

Запрашаем усіх зацікаўленых далучыцца да падзеі!

Увага! Усе прэзентаваныя выданні ў гэты дзень можна будзе набыць у краме па спецыяльным кошце, а таксама атрымаць аўтограф Уладзіміра Мацкевіча.

Аўтары самых цікавых пытанняў атрымаюць ад філосафа ў падарунак зборнік “Цытуй сваё”.