26 жніўня (серада) ў галерэі «Ў» (пр-т Незалежнасці, 37а) адбудзецца інтэрактыўная сустрэча з выкладчыкамі Еўрапейскага каледжа Liberal Arts у Беларусі (http://eclab.by/). Пачатак а 18:30.
Гэтым разам мы прапануем новы фармат прэзентацыі. «Серада ў ECLAB» дазволіць абітурыентам на ўласным вопыце даведацца, як праходзіць навучанне ў каледжы.
Падчас сустрэчы аўдыторыя не будзе проста слухаць, што расказваюць пра адукацыйную сістэму Liberal Arts выкладчыкі. Кожны ахвотны зможа сам адказаць на пытанні пра ECLAB і расказаць аб праекце астатнім. І, вядома, атрымаць прызы за ўдалыя адказы. А самым актыўным удзельнікам сустрэчы мы падорым толькі што надрукаваны нумар студэнцкага часопіса E.NOTE!
Прапануем усім ахвотным падрыхтавацца да нашай сустрэчы: на старонцы імпрэзы ў Facebook і ВКонтакте (https://www.facebook.com/events/313667932090268/ и https://vk.com/event100349730) мы будзем публікаваць тэксты пра ECLAB і мадэль навучання Liberal Arts, пра нашы канцэнтрацыі і шмат што яшчэ. Азнаёміўшыся з імі, вы зможаце адказаць на ўсе, нават самыя каверзныя пытанні, зададзеныя выкладчыкамі каледжа. А таксама падрыхтаваць свае.
Навучанне ў ECLAB – гэта не маналагічная трансляцыя інфармацыі ад выкладчыка да студэнтаў, гэта перш за ўсё дыялог і свабодная атмасфера, якія спрыяюць больш глыбокаму засваенню інфармацыі.
Вучыцца – не сумна, а займальна і часам нават весела!
Мерапрыемства ў Facebook
Мерапрыемства ў ВКонтакте
Аб праграме «Еўрапейскі каледж Liberal Arts у Беларусі»:
«Еўрапейскі каледж Liberal Arts ў Беларусі» (ECLAB) – гэта праграма, якая дазваляе атрымаць дадатковую адукацыю паводле мадэлі Liberal Arts.
Каледж задуманы як нефармальная альтэрнатыва існай у Беларусі сістэме вышэйшай адукацыі, якой даўно патрэбнае рэфармаванне. ECLAB прапануе індывідуальны план навучання, творчую атмасферу на занятках, свабодны інтэлектуальны абмен паміж студэнтамі і выкладчыкамі, а таксама развіццё навыкаў крытычнага мыслення.
Больш падрабязна аб праграме можна даведацца на www.eclab.by
Уваход вольны.
Правядзіце вечар серады ў ECLAB!
