Тэатралiзаваныя вандроўкi з Радзiвiламi у Нясвiжы
Пачатак: 29.10 (12:00)музей-запаведнік «Нясвіж»
У дні восеньскіх вакацый школьнікаў, іх педагогаў і бацькоў чакае музычна-тэатральня iмпрэза «Вандраваннi Радзiвiла «Сiроткi». Падзею ладзяць нацыянальны гісторыка-культурны музей-запаведнік «Нясвіж» і Музычны Дом «Класіка». Партнёр вандроўкi ў часе – кампанiя “Будзьма!”, на сайце якой Радзiвiлы i Цмокi утульна суiснуюць з сучаснымi дзеячамi культуры.
Драматычны акцёр Юрый Жыгамонт і артысты ансамбля старадаўняй музыкі «Кантабіле» паўстаюць у вобразах прыдворных музыкантаў, кіраўніка і ўдзельнікаў знакамітай Нясвіжскай Капэлы ў iмпрэзе, якая створана ў незвычайнай інтэрактыўнай форме. Гледачы адчуваюць сябе ў ролi гасцей Радзiвiлаў, а само дзеянне спалучае ў сабе канцэртную частку і займальны тэатралізаваны аповяд пра дасягненні Мікалая “Сіроткі”, іх гістарычнае значэнне.
Гісторыя знакамітага магнацкага роду Радзівілаў напоўненая яркімі падзеямі і дасягненнямі, з глыбіні стагоддзяў і па гэты час прыцягвае ўвагу нашчадкаў. Сярод выдатных прадстаўнікоў роду — Мікалай Крыштоф Радзівіл «Сіротка» (1549 – 1616), дзяржаўны дзеяч, падарожнік, літаратар, мецэнат, які прысвяціў сваё жыццё папулярызацыі навукі і мастацтва, барацьбе за самастойнасць Вялікага Княства Літоўскага. Менавіта ягоная постаць паўстае ў цэнтры творчага праекта «Вандраваннi Радзiвiла «Сiроткi».
Віртуознае майстэрства выканаўцаў, неардынарнасць формы, глыбокая распрацоўка сюжэту і гістарычных фактаў робяць гэты творчы і культурна-пазнавальны праект абсалютна унікальным. А атмасфера і антураж рэзідэнцыі Радзівілаў спрыяюць максімальна поўнаму ўключэнню гледачоў у гісторыка-культурны кантэкст, у якім жылі і тварылі прадстаўнікі легендарнага роду беларускіх магнатаў. «Вандраваннi Радзiвiла «Сiроткi» — гэта своеасаблівае падарожжа па часе, незвычайная экскурсія ў нашу гісторыю, адрасаваная ўсім, хто імкнецца пазнаваць новае, знаходзіць цікавыя факты з мінулага.
У iмпрэзе гучыць музыка XVI-XVII стагоддзяў: «Полацкі сшытак», Войцэх Длугарай, Вiнчэнца Галілей, Уiльям Брэйд, Джакома Пергалезі, Франчэска Джэмініані.
Iмпрэзы пройдуць з 29 кастрычніка па 3 лістапада ў Тэатральнай зале Нясвіжскага Палаца.
29/10 – 12.00 , 14.00
30/10 – 12.00 , 14.00
31/10 – 12.00
01 /11 – 12.00 , 14.00
02 /11 – 12.00 , 14.00 , 16.00
03 /11 – 12.00 , 14.00
Кошт квіткоў: 20 000 руб. (дзіцячы) і 40 000 руб. (дарослы)
Замова квiткоў i экскурсiй у Палац: 8(017)7020602, 8(029)5518051, 8(029)1903249
