У сераду, 18 студзеня а 19-й, у Варшаве адкрываецца выстава Ташы Кацубы «209 дзён шэрасці: смерць цела, неўміручасць духу».
Дата: 18 студзеня
Час: 19.00 (час мясцовы)
Месца: Galeria Promocyjna, Rynek Starego Miasta 2, Варшава
Таша Кацуба — беларуская мастачка, якая жыве і працуе ў Польшчы.
Летам 2021 года спадарыня Таша пераехала з Беларусі ва Украіну. Зусім без рэчаў і матэрыялаў жыла ў невялікім здымным пакойчыку ў Кіеве. Каб неяк праявіць сябе і адчуць сябе патрэбнай, зноў пачала ствараць. З нічога. Без колеру.
Мастачка паўгода збірала аповед пра тое, што адчувала ў эміграцыі. Гэта асабістае падарожжа, якім спадарыня Таша хоча падзяліцца з людзьмі і завершыць гэты перыяд свайго жыцця. 209 шэрых дзён — ад пачуцця ўздыму і натхнення да тугі па радзіме і адзіноты.
«Я яшчэ не ведала, што набліжаецца нешта страшнейшае, чым гэтая бясколерная будзённасць. Пачалася вайна — вялізная чорная пляма, якая доўжыцца і сёння. Упершыню я адчула смерць так блізка і нават прынялаў яе, пасябравала з ёй. Кожны дзень я была гатовы памерці, а перад сном развітвалася з жыццём», — кажа мастачка.
Праз два месяцы пасля пачатку вайны Таша адправілася ў другую эміграцыю — у Польшчу.
Гэтая выстава — спроба адлюстраваць хаця б малую частку таго, што перажываюць людзі, якія страцілі дом і блізкіх. Незалежна ад часу і месца. Агульны боль, такі розны, але такі падобны.
Уваход вольны!
Выстава працуе па 28 студзеня.
