У суботу, 18 траўня, у Віленскім беларускім музеі імя Івана Луцкевіча адкрываецца выстава раней не экспанаваных прац віленскага беларускага мастака Алега Аблажэя.
Дата: 18 траўня
Час: 18.00 (час мясцовы)
Месца: Віленскі беларускі музей імя Івана Луцкевіча, Vilniaus, 20, Вільня
На выставе будуць работы, якія адносяцца да пачатку Алегава віленскага этапу.
Самыя раннія малюнкі датаваныя 1979, калі ён вучыўся на першым курсе Віленскага мастацкага інстытута. Апошнія выкананыя ў 1990 годзе.
Выбар абумоўлены тым, што гэта пераломныя гады ў фармаванні візуальнай мовы мастака, які прыехаў у Вільню «пасля вучобы ў Віцебску, захоплены жывапісам Чурлёніса, поўны мараў аб сучасным мастацтве, уцякаючы ад сацыялістычнага рэалізму, як тады панаваў у Беларусі», але патрапіў у сітуацыю, апісаную ў літоўскай прыказцы «Bėgo nuo vilko papuolė ant meškos».
У Віленскім мастацкім інстытуце настаўнікам Алега стаў графік Альгімантас Швэгжда. Менавіта пад ўплывам Швэгжды Алег Аблажэй паступова стаў больш канцэнтравацца не на фармальных пошуках, а на выяўленні сваіх моцных бакоў як графіка.
Менавіта гэтыя работы васьмідзясятых гадоў замацавалі грунт ягонай моцнай рэпутацыі сярод калег, але за межамі вузкага кола тагачасных навучэнцаў Віленскага мастацкага інстытута яны заставаліся невядомымі.
Выстава працуе па 13 чэрвеня.
Уваход вольны.
