Выстава “Аркадзь Смоліч. Жыццё за Беларусь…”
04.10.2016
16:00 - 17:00
Літаратурны музей Максіма Багдановіча (вул. Багдановіча, 7а)
Уваход вольны
4 кастрычніка адбудзецца адкрыццё дакументальнай выставы “Аркадзь Смоліч. Жыццё за Беларусь…”, прымеркаванай да 125-годдзя з дня нараджэння знакамітага беларускага географа і грамадска-палітычнага дзеяча.
Аркадзь Антонавіч Смоліч (1891 – 1938) – адзін з заснавальнікаў беларускай сацыял-дэмакратыі, дзеяч беларускага нацыянальнага Адраджэння, старшыня Цэнтральнага бюро краязнаўства Беларусі, рэдактар газеты “Грамада”, прафесар Беларускага дзяржаўнага ўніверсітэта.
Максім Багдановіч і Аркадзь Смоліч пазнаёміліся восенню 1916 года, калі малады беларускі паэт вырашыў вярнуцца з Яраслаўля на радзіму, у Мінск. Равеснікі і аднадумцы, яны вельмі хутка сталі сябрамі, сустракаліся ў “Беларускай хатцы”, разам з Зоськай Верас рыхтавалі лемантар для маленькіх беларусаў, марылі аб будучым…
Сёння ў фондах Літаратурнага музея Максіма Багдановіча беражліва захоўваецца архіў сям’і Смолічаў, які перадаваўся нашчадкамі вучонага цягам гадоў. Матэрыялы выставы “Аркадзь Смоліч. Жыццё за Беларусь…” упершыню прэзентуюць шырокай публіцы фотаздымкі і дакументы вучонага, яго лісты жонцы і дзецям, рукапісы, машынапісы і выданні яго навуковых прац.
Асаблівую цікавасць маюць фотаздымкі, зробленыя пад час экспедыцыі Беларускага навукова-даследчага інстытуту сельскай і лясной гаспадаркі ў Мазырскім Палессі ў 1927 годзе, – краявіды, пабудовы, этнаграфічныя тыпы.
Адкрыццё выставы адбудзецца ў аўторак, 4 кастрычніка, а 16-й гадзіне.
Літаратурны музей Максіма Багдановіча
г.Мінск, вул. М.Багдановіча, 7а
тэл. 334 07 61, 334 42 69
maksimbagdanovich@gmail.com
