6 траўня ў галоўным корпусе Нацыянальнага мастацкага музея адкрываецца выстава «Залаты век беларускага іканапісу. XVII стагоддзе».
Дата: з 6 траўня па 26 чэрвеня
Месца: Нацыянальны мастацкі музей, вул. Леніна, 20, Мінск
Беларускія абразы, сакральная мастацкая спадчына XVII стагоддзя — важнага стагоддзя ў гісторыі беларускай царквы — упершыню прадстаўлены ў такім маштабным выставачным праекце.
Сярод твораў ёсць вядомыя шэдэўры — гонар музейных збораў старажытнабеларускага мастацтва — і мноства абразоў, раней не вядомых шырокаму колу гледачоў.
Гэта абразы, што былі раскрыты беларускімі рэстаўратарамі на працягу апошніх гадоў, пазбаўлены шматслойных запісаў і прадстаўлены гледачам у сваім сапраўдным абліччы; абразы, рэстаўрацыя якіх яшчэ не завершана, і абразы, ад якіх захаваліся толькі рэшткі, асобныя фрагменты жывапісу, але прысутнасць іх у экспазіцыі вельмі важная для раскрыцця галоўнай канцэпцыі гэтага выставачнага праекта, а менавіта — паказу таго, як фарміраваўся і развіваўся на працягу XVII ст. новы, самабытны стыль беларускага іканапісу.
