15 сакавіка ў Віцебскім абласным краязнаўчым музеі адкрыецца выстава «Руплівец беларускай даўніны», прысвечаная 170-годдзю з дня нараджэння Аляксея Парфёнавіча Сапунова, краязнаўцы, археографа, выкладчыка, грамадскага дзеяча, аднаго з выдатных беларускіх гісторыкаў канца XIX — пачатку XX стагоддзя.
Дата: 15 сакавіка
Час: 17.00
Месца: Віцебскі абласны краязнаўчы музей, Ратуша, вул. Леніна, 36, Віцебск
Музей прэзентуе больш за 200 унікальных дакументаў з асабістага архіва Аляксея Сапунова, звязаных з выдавецкай, выкладчыцкай, навуковай і грамадскай дзейнасцю вучонага.
Увазе наведвальнікаў прапануюць дакументы і рукапісы па гісторыі Віцебска, Полацка, іншых гарадоў Віцебскай губерні, матэрыялы па гісторыі праваслаўнай царквы, па гісторыі Прыбалтыкі, курсы лекцый для навучальных устаноў, літаграфіі да розных выданняў Аляксея Сапунова.
У праекце аб’яднаны часткі дзвюх калекцый: матэрыялы з асабістага архіва Аляксея Сапунова з фондаў музея і кніжнага збору Сапунова з фондаў Нацыянальнай бібліятэкі Беларусі.
Аляксей Сапуноў — ураджэнец Віцебшчыны, адзін з самых захопленых і крапатлівых даследчыкаў роднага краю. Ім створана каля 50 кніг і брашур, а таксама дзясяткі навуковых артыкулаў і нарысаў па гісторыі, этнаграфіі, археаграфіі Віцебскага Падзвіння.
Навуковец упершыню выявіў, сабраў, пераклаў і выдаў вялікі пласт першакрыніц па гісторыі краю. Найбольш вядомымі выданнямі з’яўляюцца кнігі «Витебская старина» і «Река Западная Двина».
Выстава будзе працаваць да 31 мая.
